Буряад Уласай толгойлогшын тоосоон июниин 28-да табадахи зарлалай парламентын һүүлшын хуралдаан дээрэ шагнагдаа. Хуралай спикерай тэмдэглэһээр, тэрэ тоосоон яһала үнэн зүб байба, гээд Восток-Телеинформ дуулгана.
- Тоосоониинь түрүүшынхиеэ иимэ дэлгэрэнгы тодоор, нюдэнэй харахаар ролик мэтээр соностоо. Толгойлогшо өөрын алиш мэдүүлэлээ тобшолон тайлбарилаа, ямар шиидхэбэри абтааб, энэ тэрэ бэрхэшээлнүүдые яажа шиидхэхэб гэхысэ дууһан хөөрэжэ үгөө. Би, юрэнхы дээрээ, яһала үнинэй депутатби, тиигээшье һаа иимэ тодо тоосоо түрүүшынхиеэ шагнажа үзэбэб. Минии һанахада, депутат бүхэн, уригдаһаншье зон тэрээниие ойлгожо абаа ëһотой. Эндэ ганса миин лэ үгэнүүд бэшэ, харин засагай газарай ажалай али бүхы онол арганууд тобшологдон хэлгдээ. Ажалайнь аша дүнгүүд тодо элеэр тобойлгогдоо. Хэды удааншье һаа, ехэ удхатай байба, - гээд Доржиев онсолоо.
Гэхэ зуураа, энэ сагта шиидхэжэ үрдигдэһэн асуудалнууд тухай тэрэ тэмдэглэхэ юм. «Энэ хадаа татагдаһан инвестицинүүд, ажалай һууринууд, налог түлэгшэдые таталга, харгынуудые барилга болон бусад олон асуудалнууд», - гээд спикер тайлбарилба.
Улас түрын толгойлогшо тоосоон дотороо дутуу дундануудаашье балай нюугаагүй. «Жэшээнь, һүүлэй үеын хур бороогүй хуурай уларил хүдөө ажахыда нилээд гарза гашалан ушаруулаа. Орооһо, тэжээлэй үйлэдбэримнай хохидоо. Эды шэнээн гаргашанууднай энэ һалбарида дуталдана гээд ойлгосотой. Теэд, яахаб байгаалитай арсахагүйш», - гээд Цырен-Даши Доржиев хэлэнэ һэн.
Анхан Восток – Телеинформ агентствын дуулгаһаар, энэ зарлалай Арадай Хуралай депутадууд һүүлшынгээ хуралдаан дээрэ уласай толгойлогшо Алексей Цыденовай засагай газарай ажалай дүнгүүд тушаа тоосоо шагнаа һэн. Тоосооной урда һунгамалнуудай урда Цыденовай наашаа, энэ тушаалдаа томилогдоһоной удаадахи хубилалтанууд тухай таба минутын ролик харуулагдаһан байна.
