Июниин 28-да Арадай Хуралай ээлжээтэ хуралдаан Улаан-Үдэдэ ажалаа дүүргэбэ. Суглаан дээрэ 33 асуудал харагдахаар түсэблэгдэнхэй. Тэрэшэлэн, һунгамалнууд «Засагай Газарай сагай» үргэлжэлдэ Буряад Уласай Засагай Газарай Агуу Илалтын 75 жэлэй ойдо бэлдэлгэ тухай тоосоо шагнаха зэргэтэй.
Түрүүшын дуугаар Буряадай Толгойлогшо Алексей Цыденовай Засагай Газарай ажал хүдэлмэри тухай тоосоон табигданхай. Тэрээн зуураа тэрэ депутадуудай асуудалнуудта харюусаха зэргэтэй. Энэ асуудалаар гол элидхэгшын хажуугаар Арадай Хуралай Олониитын түрын талаар хорооной түрүүлэгшын орлогшо Виктор Малышенко элидхэл хэлсэхэ.
Гадна, улас түрын 2017 оной мүнгэн һангай эрьесэ тухай тоосоон эндэ баталагдаа. Урид олоной хабаадалгатай уншалганууд дээрэ Буряад Уласай мүнгэн сангай сайд Всеволод Мухин гол баримтануудтаяа танилсуулһан байгаа. Буряад уласай олзо орошо нëдондо 50,2 миллиард түхэриг бүридүүлээ, гарзань – 52,2 миллиард, тиин абахада, уласай мүнгэн сангай эрьесэ 2,1 миллиард түхэриг дутуугаар гүйсэбэ ха. Гүрэн түрын урдахи үри энэ сагта 11,3 миллиардда хүрөөд байна, гэбэшье, үриин энэ хэмжээн Ородой Холбооной Уласай Мүнгэн сангай кодексоор баталагдаһан хэмдэ багтаһан жэшээтэй болоно.
Нëдондо Буряад уласай өөрын налог татабариин, бусадшье орошонууд 0,3 %-оор доошолоо, харин бусаалтагүйгөөр ороһон мүнгэнүүдэй хэмжээн 24,3 %-оор дээшэлээ, тиин тиигэн, улас түрын өөрын олзын хэмжээн юрэнхы дээрээ 2016 онойхи 51 %-ын хажууда 46 % бүридүүлээ. Бодото дээрээ налог татабариһаа һанда 2016 онойхиһоо 13 саяар дээшэ мүнгэн ороо. Зүгөөр налогһоо гадуур орогшо мүнгэнэй хэмжээн 72,3 саяар доошолһон байна. Мүн тиихэдэ, 2017 ондо аяар 1,5 миллиард мүнгэн ашаглагдаагүй үлөө. Ехэнхинь - барилгын яаманай зэмэ. Гол шалтаг гэжэ, тушаалтад мүнгэнэй оройтоһые гү, али дабхар-дабхар тендернүүдые соносхохо баатай болохые нэрлэбэ, тиигээд, эды ехэ мүнгэнэй хэлсээнүүдые диилэхэ арга шадалтай компанинууд энээгүүрнай үгы шахуу юм ха.
