Арадай Хуралай гэшүүд зайн галай халаалтада байшан гэрнүүдые шэлжүүлхэ асуудалаар нүүдэл суглаанда оролсоо. Арадай Хуралай эдэй засагай бодолгын, байгаалиин баялиг ашаглалгын болон экологиин талаар хорооной түрүүлэгшэ Парламентын бүлэгые толгойлоо. "Россети Сибирь" - "Бурятэнерго” ПАО-гой филиалай захирал, Арадай Хуралай гэшүүн Сергей Козлов элшэ хүсэнэй ажалшадые түлөөлөө.
Нүүдэл суглаанда хабаадагшад байшан гэр ошожо хараа, тэрэ гэр “Сэбэр агаар” гэһэн гүрэнэй программаар зайн галай халаалтада оруулагдаа. Энэ гэр Буряад ороной ниислэлэй зүүн бэедэ оршодог, тэндэ “зайн галай халаалтада үмсын гэрнүүдые шэлжүүлхэ туршалтын түсэл бэелүүлгэ” хараалагдана. Энэ гэртэ элшэ хүсэнэйхин тэдхэмжын тоосоогоор зайн галай халаалтын түхеэрэмжэ абажа тодхоһон байна. Гэрэй эзэгтэйн хэлэһэнэй ёһоор, гэртэ аятай зохид болоо, гэртэ түлеэ абажа түлижэ байхаһаа хямдашье боложо үгөө. Тиихэдэ тэндэхи подстанци болон заһабарида үнинэй орохоор болоһон хуушан трансформаторнуудые ошожо хараа.
Эдэй засагай бодолгын талаар хорооной түрүүлэгшэ Иннокентий Вахрамеевэй тэмдэглэһэнэй ёһоор, хэрэглэгшэдые сахилгаан галаар хангалга һайжаруулха зорилгоор зайн галай сүлжээ һэльбэн шэнэлхэ асуудал болбол тон шухала болонхой, түргэн саг соо шиидхэхэ хэрэгтэй ажал юм.
Сергей Козловой хэлэһэнэй ёһоор, элшэ хүсэнэй байдал дээшэлүүлхэ федеральна программын түсэлдэ Буряад орониие оруулга болбол энэ асуудал шиидхэхэ нэгэ аргань болоно. Уласта энэ ажал хэлгэ 20 млрд түхэригтэ сэгнэгдэнэ. Зүгөөр тэрэнэй тулада уласай бюджедтэ суг һомололгодо өөрын хуби хараалха хэрэгтэй байна.
