Буряад Уласай Арадай Хурал улас түрын Эдэй сайдаар ниислэл хотын сити-менеджер Занда Сангадиевые томилхые зүбшөөбэ. Энэ асуудал парламентын 2-р һарын 25-да үнгэрһэн ээлжээтэ сесси дээрэ харагдаһан байгаа. Тэрэн олонхи дуугаар дэмжэгдээ. Сангадиевые һунгамалнуудай урд Буряад Уласай Түрүүлэгшын орлогшо – Толгойлогшын захиргааниие хүтэлбэрилэгшэ Петр Носков зууршалаа.
Анха түрүүн Сангадиев Арадай Хуралай бүхы хороонуудаар дамжан, ажал түсэбүүдтэеэ танилсуулаа һэн гээд Носков һануулба. Депутадууд Засагай Газарай нөөсэ халаанай тоодо тэрэ ороһон байгаа гээшэ гү гэжэ һонирхоо. Хуулиин ёһоор гүрэнэй тушаал эзэлхэ эрхэ үгэдэг үнөөхи халаан юрын мэргэжэлтэдһээ сайдай орлогшо болотор тушаалнуудые хараалдаг хаяа гээд Носков энээндэнь харюусаһан байна.
Улаан-Үдын сити-менеджер Эдэй сайдай тушаалда томилогдобол ямар даабаринуудые нэн түрүүн дүүргэхэбиб гэжэ түсэб һанамжануудаараа хубаалдаа. Сангадиевай һанамжаар, Эдэй яаманай урда тон шухала табан зорилго бии – инвестицинүүд, мүнгэн һангаа арьбадхаха, Буряадайнгаа нютаг нугануудые үргэхэ, улад зоноо ажалаар хангажа олзотой болгохо, мүн холын хараатай түсэбүүдые нарижуулха хэрэгтэй. 2012-2014 онуудта инвестици таталга нилээд һуладаад байна, 2015 ондо һайжараа боложо байһан байдал энэ гарзануудые хаажа шадахагүй байна гээд Сангадиев тэмдэглэнэ һэн.
Һунгамалнууд зарим тэды хүсэл бодолнуудаа сайдта дамжуулаа – аяншалгын һалбарида анхаралаа хундуулха, юуб гэхэдэ республикын һанда яһала мүнгэ асардаг энэ һалбари тусхай агентствын усадхагдаһанай удаа Эдэй яаманай хороондо даалгагдаһан байгаа. Тэрээнһээ гадна, хүдөө ажахыда, үйлэдбэридиин һалбарида анхарал табиха, мүн ехэ бизнесэй эндэһээ зөөхэ шалтагуудые улам һайнаар шэнжэлхэ гэхэ мэтые дурадхаба. Депутат Цыденжап Батуев мүнгэн һан арьбадхаха асуудал Мүнгэ алта харгалзалдаг яаманда орхёод, холын хараанай түсэблэлгэдэ гол анхаралаа табиха тухай зүбшөөлөө үгөө.
Сангадиевые Эдэй яаманай сайдай тушаалда томилхо тухай шиидхэбэри нюусаар дуу үгэлгын маягаар абтаба. Томилхые 49 депутат зүбшөөгөө, харин 4-ниинь буруушаагаа гээд дүнгүүд гэршэлһэн байна.
