Буряад Уласта «орёо асуудалтай» гэрнүүдэй хубитаяа оруулһан 600 зон байрынгаа түлхюурнүүдые абаба: 471 хубитаяа оруулагшад 2017-2018 оной, 192-нь 2019 оной эхинһээ. Энэ долоон хоногто үшөө нэгэ гэрэй барилга дүүрэбэ. Тиигээд һаяын сагта 59 байрын түлхюурнүүд үгтэхэ,-гэжэ А.Цыденовай хөөрэһэн тухай Восток-Телеинформ Буряад Уласай Засагай газарай хэблэлэй албанһаа дуулгана.
-Буряад Уласта гэр барилгада хубитаяа оруулагшадай эрхэ заһалгын ажал үргэлжэлүүлэгдэһээр. Минии үүсхэлээр 2017 оной март һарада Буряад Уласай Засагай газарта тусхай комисси байгуулагдаа. Энээнэй бүридэлдэ Холбоото Уласай ба Нютаг можын гүйсэдхэхы газарай засагай зургаанай түлөөлэгшэд, гэр баригшад ба хубитаяа оруулагшадай эдэбхитэнэй бүлэгүүд оронхой. Эмхи журамтайгаар ажал ябуулһанай һайгаар энэ комиссиин байгуулагдаһан сагһаа хойшо мүнөөдэр болотор 63 айл байрын түлхюурнүүдые абанхай,-гэжэ толгойлогшо хэлэнэ.
Мүнөө байдалаар 10 орёо асуудалтай объектнүүд байна, тэдэнэй хоёрынь гурбан һарын хугасаа соо дүүрэхэ ёһотой. Бэшэ объекнтнуудаар, үнэн сэхэ бэшэ барилгашадаар ажал ябуулагдана.
2019 оной июлиин 1-һээ хубитаяа оруулан гэр барилгада шэнэ гурим нэбтэрүүлэгдэхэ. Энэ сагһаа хойшо барилгын компанинууд барилгаяа тушаатараа хубитаяа оруулагшадай мүнгэ хэрэглэхэ ёһогүй. Эдэ зоной мүнгэн банкын тусхай счёт дээрэ хадагалаатай байха. Иимэ 10 млн түхэриг хүрэтэр эксроу счёдууд гүрэнэй страхованида мүнхэлэгдэнхэй.
