Арадай Хуралай Һангай, налогой болон мүнгэн талаар хорооной гэшүүд түрүүлэгшэ Зоригто Цыбикмитовай хүтэлбэри доро Байгалай үмэнэхи үндэһэ яһатанай музей хүрэжэ байра байдалтайнь танилсаба. Энэ эмхиие саашань хүгжөөхын тулада улас түрын һанһаа мүнгэ дамжуулха шухала. Соëлой сайдай орлогшо Николай Емонаковай хэлэһээр, юрэнхыдөө, этнографиин музей өөрыгөө хангахын хажуугаар уласай һанда яһала мүнгэ оруулдаг – жэл бүри 100-аад мянган хүн эрьен гарадаг. Тэдэнэй асарһан мүнгэнэй тоо эрид дээшэлүүлхээр арганууд бии, гээд музай зарлал Сергей Мещеряков һанамжална.
- Үбэлдөө ажабайдалнай замхаха баатай. Хэрбээ дулаан танхимуудтай болоо һаамнай музеймнай бүхэли жэлээ бараг хүдэлжэ байха һэн. Үзэсхэлэнгүүдые дэлгээхэ талмайнуудтай болобол, Ородой бусад орон можонуудһаа, Монголһоо, Хитадһаа нүхэдүүдээ урижа байха байгаабди, - гээд тэрэ хөөрэбэ.
Дулаан гэрнүүдэй үгыдэ ажалшадташье таагүй. Музейн дэбисхэр дээрэ захиргаанай байра баһал үгы. Захирал тиимэһээ «Танскийн гэр» гэһэн түүхын, соëлой баялиг гэгдэһэн байшан соо байрланхай. Гайхамшагтай үзэсхэлэнгүүд юрын лэ амбар соо хадагалаатай байна, гэжэ депутадууд обëорбо. Жасаяа хадагалха байрагүй гээшэнь баһал гайтай. Баримталагдаха ëһотой эрилтэнүүдые баримталха ямаршье арга үгы. Һэльбэн шэнэлэлгэдэ баһал мүнгэн үгы.
Һунгамалнууд «амиды булан» ошожо мүн лэ хараа. Тэдэнэртэ Сергей Мещеряков амитадые бариха тухай гүрэнэй шэнэ хуули ëһонуудай абтаһан тухай анхарал хандуулба. Юуб гэхэдэ, амитадые баряад байха шэнэ эрилтэнүүд һаядаа буулгагдаха байха. Тэрэнь баһал мүнгэнтэ байлтай.
- Үнэтэй сэнтэй үзэсхэлэнгүүд иимэ тулюур газарта хадагалагдажа байхань харамтай. Энэ ушарта туһа хүргэнгүй одоо аргагүй. Бусадшье асуудалнууд гаража ерэнэ. Мүнгэ һомолхо гээшэ шухалай болонхой. Энэ асуудалые удаадахи суглаандаа зүбшэхэбди, - гээд Зоригто Цыбикмитов дүн согсолбо.
