Дохëо ушарһаа һэргылэмжын МЧС гэдэг яаман мүльһэн дээрэ гарахые хорихо тухай хуули абахые үүсхэнэ. Мүльһэн дээрэ гахахые хориһон тусхай тэмдэгүүдые тоогоогүй зониие, мүн гаталалгын хоëр тээ 100 метр зайһаа дүтэ газарта сүмхөөг соолоһон загаһашадые мүнгөөр хэһээхэ хэрэгтэй гээд онсо байдалай мэргэжэлтэд бодомжолно. Юрэнхыдөө хуули ëһын түсэл Арадай Хуралда дамжуулагдаа үды, гэбэшье МЧС-эй ахалагша инспектор Евгения Каширихинагай үгөөр, тиимэрхүү удхатай дансын хэрэгэй гараһаар үнинэй. Ушар юуб гэхэдэ, 10 жэлэй туршада Буряад уласта уһанда унажа, 968 хүн наһа бараа.
Үүсхэгдэһэн тэрэ дурадхал Арадай Хуралда зүшэн хэлсэгдээ. Нютагай өөрын хүтэлбэринүүд дүрим хазагайруулагшадта протокол табижа, яла тохожо байха жэшээтэй. Харин муниципалитедтэ арга шадал үгы. Эгээл тиимэһээ Кабанскын аймагай толгойлогшо Алексей Сокольников энэ мэтын харюусалга МЧС-эй мэдэлдэ байгаа һаа дээрэ гээд тоолоно.
Тус хуули ëһо хоëр талатай. Уһанай аюулһаа арад зоноо хамгаалжа байха шухала гээд булта ойлгонобди. Харин нүгөө тээһээ абахада, нютагай зоной тала мүн хараада абаха хэрэгтэй. Жэшээнь, хүн зон убһэеэ голой арал дээрэ обоолдог заншалтай, тэрэнээ үбэл шэрэдэг агша. Тиигээдшье хахууляар загаһа олзоборилдог зон баһал байна? – гээд «Твороговское» һурингай толгойлогшо Сергей Мухин һанамжаараа хубаалдаба.
Гадна, уһа горхондо улад зонойнгоо ами наһа аршалжа байха дүримдэ хубилалтануудые оруулха саг ерээ гэхэ мэтын һанамжанууд мүн лэ соностоо. Тэрэнээ зүб мүрөөр һэлгэһэнэй удаа хэһээхэ, хорихо тухай бодохо байгаабди гэлдээншье болоо.
Юрэнхы дээрээ хуули ëһонууд гээшэ муниципалитедүүдтэ арга боломжонуудые олгуулдаг, зүгөөр мүльһэн дээрэ аюулгүй байдал сахиха гурим тэдэнэйл мэдэлдэ үлэхэ ëһотой гээд Арадай Хуралай депутат Виктор Малышенко тэмдэглээ һэн.
