Һаяхана үнгэргэгдэһэн «2019 болоод 2020, 2021 онуудай болзорой улас түрын бюджет тухай» хуулиин түсэл шагналгада Буряад Уласай Засагай Газарай тушаалтад хабаадалсаба. Тэндэ уласай хэмжээнэй тушаалтадһаа гадна муниципалитедэй зэргын ноëд һайд, мүн ниитыншье эдэбхитэд байлсаа. Буряадай Засаг газарай түрүүлэгшын нэгэдэхи орлогшо, Арадай Хуралай дэргэдэ Буряад Уласай толгойлогшын нэрэ хүндые түлөөлэгшэ Игорь Шутенков уншалгануудай дүн согсолходоо, мүнгэн һангай бүридхэлдэ олоной хабаадаһые һайшаан зүбшөөбэ:
Улас түрын бюджет гээшэ орон нютагай бүхы зоной хараа бодол дайрадаг, байра байдалыньш энээнһээ сэхэ дулдыдадана ха юм. Эгээл иигэжэ, бултанай һонорто зүбшэлсэжэ, хэлсэжэ байхадамнай түмэн арадай хүсэл һанамжанууд хуу дууһан хараада абтаха жэшээтэй бшуу, - гээд тэрэ онсо тэмдэглээ һэн.
Уншалгын үедэ улас ороной улад зоной байра байдал, эдэй засаг түрын хүгжэлтын асуудалнуудаар хэдэн дурадхалнууд соностоо, илангаяа, аймаг хотонуудые дэмжэхэ талаар һанамжанууд табигдаһан байна. Эдэ мэтые хараада абан, Арадай Хуралай депутадуудай, Засагай Газарай тушаалтадай, мүн Тоололгын палатын мэргэжэлтэдэй хабаадалгатай ажалай бүлэг үнөөхи хуулин түсэлые нарижуулан зохëохо жэшээтэй. Бюджет нарижуулхадаа тэдэ үндэһэтэнэй зиндаагай түсэлнүүдтэ, Ородой Холбооной Юрэнхылэгшын 2018 оной «майн зарлигуудта» анха түрүүн анхаралаа хандуулха зэргэтэй.
Энэ сагта Ородой Холбооной Уласай хэмжээндэ субъект болохо орон нютагуудһаа захилнууд орожо байна. Тэрээн зуур манай улас хэды шэнээн тэрээндэ оролсохо аргатайб гэжэ хүсэд ойлгогдоногүй. Гэбэшье, бидэ тон ехээр оролсожо хабаадахые оролдобобди, - гээд улас түрын засагай газарай түрүүлэгшын нэгэдэхи орлогшо мэдүүлбэ.
