Арадай Хуралай депутадууд Буряад Уласай «2017 оной болон 2018, 2019 онуудта хараатай улас түрын мүнгэн һан тухай» хуулида заһалтануудые оруулба. Нэн түрүүн элүүрые хамгаалгын һалбарида тэдэ анхаралаа хандуулаа. Һунгамалнуудай оруулһан заһалтаар, хүсэд бүридхэгдөөгүй фельдшерскэ пунктнуудай дунда мэргэжэлэй эмшэд болоод бага зэргын хотонуудай врачнуудта саг нэгэтээр үгтэхэ зэргэтэй хамта дээрээ 16,5 сая мүнгэн улас түрын һанһаа дамжуулагдаха болобо.
Хүдөө нютаг ошохо зониие хангаха мүнгэн анхан хараалагдаһан байһан һаа, холын бага хотонууд руу ажаллахаяа ошоһон мэргэжэлтэдые дэмжэхэ мүнгэн хараалагдаагүй байгаа. Тиимэһээ бага зэргын хото ошожо ажаллаха врачнуудта 700 мянган түхэригэй тэдхэмжэ, мүн 200 мянган түхэриг дунда мэргэжэлэй эмшэдтэ хараалагдаба, - гээд социальна засагай хорооной түрүүлэгшэ Александр Стопичев тэмдэглэбэ.
Гадна, Мухар-Шэбэрэй аймагай Сагаан нуурай амбулаториие заһабарилгада 16,5 сая түхэриг шэглүүлэгдэхэ. Семашкын нэрэмжэтэ улас түрын больницые болон Зүүн арадуудай эмшэлгын түбые хангалгада 15-15 сая түхэриг тус тустань дамжуулагдаба. Мүн Онохой нютагай поликлиникые заһабарилгада 10 сая түхэриг эльгээгдэхэ болобо.
Тэрэшэлэн, Тарбагатайн тамирай стадион барилгада - 11,5 сая, Соолго нютагай тамирай танхим брилгада – 14,5 сая түхэриг шэглүүлхэ шиидхэбэри абтаба. Гусиноозерск хотын уһаар хангалгын түхеэрэмжэ хабсарха хэрэгтэ 10 сая шахуу мүнгэн ошохо, мүн улас түрын һургуулиинуудые заһабарилгада 386,5 сая түхэриг ябуулагдаха болоо.
