Алексей Цыденов Буряад Уласай гүрэнэй шагналаар соелой болон уралигай hалбариин лауреадуудые шагнаба. Уран зохёолой талаар «Убить время» гэһэн номой автор Буряад Уласай гүрэнэй шан Геннадий Башкуевта барюулагдаа.
Уран урлалай талаар Юрий Мандаганов, Чингис Мандаганов, Доржо Мандаганов, Роман Номоконов, Гэсэр Галсанов гэгшэдэй зохёохы бүлгэм Улаан-Үдын түмэр замай вокзалай ханануудые шулуугаар шэмэглэһэн «Дээдэ-Yдын сайлалга», «Минии Буряад орон», «Агууехэ сайн зам», «Байгалай домогууд» гэжэ паннонуудые бүтээжэ, үндэр шанда хүртэбэ. Олег Петелин, Нина Рыжова (Туманова), Лиана Щетилина, Елизавета Суранова Н.А.Бестужевай нэрэмжэтэ Ородой театрта «Наводнение» гэһэн зүжэг найруулан табиһанайнгаа түлөө хоёрдохи шангаар урмашуулагдаба.
Театрай уран урлалай талаар мэргэжэлтэ театрай искусствын хүгжэлтэдэ ехэ хубитаяа оруулhанайнгаа түлөө Галина Шойдагбаева шагнагдаа. «Буряад Уласай соёлой габъяата хүдэлмэрилэгшэ» гэжэ үндэр нэрэ зэргэ уран зохёолшон, «Буряад Уласай уран зохёолшодой холбоон» гэжэ уласай олониитын эмхиин правлениин гэшүүн Алексей Гатаповта олгогдобо.
