2019 ондо зургаа һарын хугасаа соо Буряад Уласта 631 бүлэдэ түрүүшын үхибүүнэй түрэхэдэ нэгэ дахинай түлбэри тогтоогдоо. Үшөө 589 бүлэнүүд материнска капиталай мүнгэ хэрэглэбэ, гэжэ Восток-Телеинформ Буряад Уласай Засагай газарай мэдээсэлэй албанһаа дуулгаба.
3-дахи ба удаадахи үхибүүдтэ һара бүри 11 мянган 200 түхэриг 1133 бүлэнүүд абана.
Буряад Уласай ДФО-до ороһоной ниигэмэй тэдхэмжын хэмжээ ябуулганууд тухай Алексей Цыденов Ород Уласай Минвостокразвитиин дүн гаргалгын тушаалтанай зүблөөн дээрэ иигэжэ хөөрэбэ.
Энээнэй хажуугаар, 2 гү, али 2-һоо олон үхибүүдтэй зон жэлэй 5%-оор ипотекээр гэр абаха аргатай болоо. Ганса Буряад Уласай Ипотечнэ корпораци 4 иимэ кредит бэелүүлээ. Коммерческэ банкнуудаар баһашье иимэ бага ставкатай ипотекэ хэжэ болохо.
Энэ жэлэй эсэстэ Алас Дурнын федеральна тойрогой ажаһуугшад хүнгэлтэтэйгөөр 2 % ставкатай ипотекэ абажа эхилхэ. Энэ хэмжээ ябуулгада Россин Минвостокразвитиһаа 15 млрд. түхэриг һомологдохо.
«Шулуун гэртэ байра абалгада, гэр барилгада, заһалгада 2 % -оор ипотекэ абалгын журам бидэ бэлдэхэбди. Иимэ кредит 20 жэлээр түрүүшын түлбэригүйгөөр үгтэхэ болоно. Энээндэ «Дальневосточный гектар» программада хабаадагшадай, залуу гэр бүлынхидэй али ба нэгэниинь 35 наһа хүсөөгүй байха ёһотой, - гэжэ Александр Козлов дуулгаба.
