Декабиин 13-да Буряад Уласай Арадай Хуралай ээлжээтэ, 21-дэхи хуралдаа сесси үнгэрхэ. Энээн тухай захиралтада парламентын спикер Цырен Доржиев гар табиба. Сессиин үзэмжэдэ гол асуудал гэжэ 2017 оной мүнгэн һан тухай хуулиин түсэл хоёрдохи уншалгада табигдахаар түсэблэгдэнхэй.
Восток-Телеинформын анхан мэдээсэһээр, тус хуулиин түсэл нэгэдэхи уншалгаар баталагдаа һэн. Улас түрын Мүнгэнэй яаманай дурадхаһан 2017 оной бюджедэй түсэлэй ёһоор, тэрэ жэлдэ дүн хамта 40,8 миллиард түхэриг олзо орохоор багсаагдана. Саада хоёр жэлнүүдтэ олзын хэмжээн 38,5 миллиард түхэригөөр орожо байхаар хараалагданхай. Тиин жэл бүри 2,3 миллиард түхэригэй дутагдал үзэгдэжэ байха жэшээтэй. Гүрэнэй урда үри шэриин дээдэ хэмжээн 2018 оной январиин 1-нэй үдэр 14,5 миллиардһаа дээшэй байха ёһогүй.
Хойто жэлдэ бүхы шахуу гаргашанууд секвестртэ орохо. Буряад Уласай Тоололгын палатын уридшалан хэһэн ажаглалтын баримтануудаар, бүхы гаргашанууд хагсаагдаха. Барилгын болон гэр-байрын ажахын тараал гүрэнэй программа хангалтын мүнгэн, жэшээнь, аяар 5,5 дахин бага болгогдоо. Тиин энэ хэрэгтэ 526 сая түхэриг шэглүүлэгдэхэ, найман хэмжээ ябуулга багтааһан «Гэр байра барилга хүгжөөлгэ» гэһэн заршам огто мүнгэгүй үлөөгдэбэ. Гадна капитальна заһабарилгада гэжэ, хуушаржа аюултай болоһон гэрнүүдһээ улад зониие нүүлгэлгэдэ гэжэ, тэрээн зуур БАМ-һаашье гаргаха хэрэгтэ хараалагдаһан мүнгэнэй хэмжээн мүн лэ хагсагдаа.
