Арадай Хуралай Түрүүлэгшэ Цырен-Даши Доржиев улас мужын һанһаа хангагдаха гүрэнэй программануудай зарим хэмжээ ябуулгануудые улам наринаар хаража үзэхэ тухай һанаһанаа мэдүүлбэ. Жэлһээ жэлдэ горитой мүнгэн нэгэ хэрэг зорилгоһоо нүгөө тээшээ шэглүүлэгдэнэ, энэ хадаа үндэһэлхэ гуримай хүсэд болбосоруулагдаагүйһөө эхитэй гээд тэрэ мүнөөдэр, ноябриин 11-дэ үнгэрһэн 2016 оной бюджет тухай олоной хабаадалгатай зүблөөн дээрэ тэмдэглэбэ.
Энэ ушарһаа гүрэнэй программануудай үйлэ хэрэгүүдые үшөө һайнаар, улам наринаар хэр аша үрэтэй байхаб гэхысэ шүүмжэлэн хараха шухала. «Түсэблэгдэһэн хэмжээ ябуулганууд улас түрын хүгжэлтэдэ хэр нүлөөтэйб, улад зоной байдал һайжаруулгада аша туһатай гү, һүүлшын дүн ямар байха ёһотойб гэхэ мэтэ хараада абтажа, мүнгэ һомолхо шиидхэбэри абтаха зэргэтэй. Нютагайнгаа эмхинүүдые түрүү ээлжээндэ мүнгөөр хангаха ёһотой», - гэжэ тэрэ тайлбарилба.
Мүнгэн һангай сайд Игорь Шутенковай дуулгаһаар, хойто жэлдэ һангай бүхы гаргашануудай 96 хубинь гүрэнэй 19 программада шэглүүлэгдэхээр энэ сагта хараалагданхай. Тиигэжэ, улад зоной эрилтэнүүдые хангалтада хабаатай найман программада ехэнхи мүнгэ һомологдохо. Эндэ 30,1 млард. түхэриг гаргашалагдаха.
Ерэхэ жэлэй бюджет тухай тоосоходоо үйлэдбэрилгын, зоной эд худалдан абахын хэмжээн, мүн инвестици татаса балай ургахагүй ха. Гэбэшье, ерэхэ жэлэй бюджет хүгжэлтын хараатай, хуушанай бэрхэшээлнүүдые дабаха арга олгуулха, зүгөөр улам харюусалгатай болохо ёһотой, - гээд Доржиев онсолоо. Тэрээн зуур, хэсүү хүндэ асуудалнуудай ушархаһаа һэргылхэ юм.
Жэшээнь, налогой талаар үри мүнөөдэр 725 сая түхэриг бүридүүлнэ. Тэрээнһээ гадуур, муниципалитедүүдэй үри шэри 2,7 млрд. түхэригтэ шаханхай. «Нютаг нугануудай мүнгэн сан үнэхөөрөөл шахардуу байдалда, - гэжэ Арадай Хуралай спикер дуулгаба, - Юрэдөө, хүн зоной байдал хангалгада заабол шэглүүлэгдэдэг мүнгэнэйнь хэмжээн жэл бүри ехэ болоно. Нүгөө тээһээ олзо оршонь агшажал байха. Тиимэһээ горитой туһаламжагүйгөөр тэдэ өөһэдөө бирахагүй гээд ойлгосотой».
Хойто жэлэй бюджедэй түсэл ноябрь соо ээлжээтэ сесси дээрэ нэгэдэхи уншалгаар абтахаар түсэблэгдэнэ. Мүнөөдэрэй байдалаар, гол баримтануудынь баталагдаатай. Буряад Уласай олзо оршо 41,3 млрд. түхэриг бүридүүлхэ, гарзань – 43,7 млрд., тиин 2,3 млрд. түхэригэй дефицит гаража ерэнэ. Гүрэн түрын урдахи үриин дээдэ хэм 2017 оной январиин 1-дэ 12,7 млрд-һаа дээшэй байха ёһогүй. Энэ удаа бюджет тухай хуули 1 жэлээр абтаха, - гээд һануулая.
