«Энэ хадаа элүүржүүлгын хэрэгтэ аргагүй ехэ алхам гээшэ, энэ манай эрдэмтэдэй ехэ туйлалта. Энэ сагhаа хүн зон hайн арга абаха, түргэн бараг болохо»,- гэжэ Буряад Уласай Арадай Хуралай түрүүлэгшэ Владимир Павлов «NovoSkin» гэжэ хэмэл арhанай үйлэдэбэри тухай хэлэбэ.
Энэ үйлэдэбэри эхилhэнэй нээлгын ёhолол Буряад Уласай Ажа үйлэдэбэриин паркда үнгэрөө гэжэ hануулая. «Диамед» гэжэ компанида ородог «SheneSkin» гэжэ бүлгэм энэ хэрэг бүтээхэ. Энэ хэмэл арhан хүнэй яра шарха, дүрэhэн, хүлдэhэн арhа, элдэб арhанай үбшэ аргалха болоно. Инновационно-клеточно технологиин хүсөөр бүтээгдэhэн «NovoSkin» гэжэ хэмэл арhан хари гүрэнэй аналогуудhаа үнэгүй, тиигээдшье hайн шанартай.
Арадай Хурал уласай бюджедэй хуули баталхадаа, хододоо эрдэм ухаанай проектнуудта анхаралаа хандуулдаг, манай эрдэмтэдэй арга шадабарияа бэелүүлхэ арга дэмжэдэг гэжэ В.Павлов тэмдэглээ.
Энэ арга хэмжээндэ Арадай Хуралай Эдэй засагай талаар хорооной түрүүлэгшын орлогшо Егор Олзоев, Газарай асуудалнуудай, хүдөө ажахын политикын ба эд хэрэглэлгын дэлгүүрэй талаар хорооной түрүүлэгшын орлогшо Сергей Пашинский хабаадаа гэжэ Буряад Уласай Хуралай мэдээсэлэй албанhаа Восток-Телеинформ дуулгана.
