Арадай Хуралай энэ болзорой зарлалай һүүлшын хуралдаан шагналнуудһаа эхилээ. Суглаанай урда спикер Цырен-Даши Доржиевай соносхоһоор, энэ хуралдаан онсо удхатай, юуб гэхэдэ, зарлалай хүдэлхэ болзорые тэрэ эсэслэхэ болоно. Энэ ушарһаа шалгарһан депутадуудай аша габьяа хайра шагналнуудаар, үргэмжэлэй үнэмшэлгэнүүдээр болоод үнэ сэнтэй бэлэгүүдээр тэмдэглэхэ гэжэ шиидхэбэри абтаһан байгаа. Һунгамалнуудта тэдэниие уласай толгойлогшо Алексей Цыденов барюулба, гээд Восток-Телеинформ дуулгана.
Толгойлогшо олонхи һунгамалнууд удаадахи зарлалда дахяад һунгагдаха аабза гээд найдажа байһанаа мэдүүлбэ: Энэл зандаа хамта, үгэеэ ойлголсожо, нэгэ хүсэл зоригтойгоор хүдэлхэбди. Үдэшэнэ бэшэбди, ажалаа үргэлжэлүүлхэбди. Та бүгэдэ дүй дүршэлтэйт, хүн бүхэнтнай хамаг юумэ үзэһэн, гаталһан, дабаһан байха. Удаадахи зарлалда тудаа үгышье хадаа, ондоош ажал зиндаада хүдэлөө һаа түрэл Буряад оронойнгоо сэсэглэн һалбархын түлөө үнэн сэхээр шармайха гээд бата этигэнэб, - гээд Цыденов шагналайнгаа ëһолол эхилээ һэн.
Буряад Уласай Толгойлогшын июниин 27-ой зарлигаар Буряад Уласай урда аша габьяатай ажал эрхилһэнэйнгээ түлөө «Ажалай абьяас» орденой медаляар депутат, Улаан-Үдын авиазаводай хүтэлбэрилхы зарлал Леонид Белых шагнагдаба. Майн 15-ай зарлигаар үндэр амжалтануудые туйлаһанайнгаа түлөө Игорь Марковец шагналда хүртэбэ.
Буряад Уласай Засагай Газарай июниин 25-ай тогтоолоор улас түрын хуули ëһонуудые нарижуулан баталха хэрэгтэ аша габьяатайгаар хүдэлһэнэй түлөө Цыденжаб Батуев, Анатолий Кушнарев, Александр Стопичев, Борис Базаров гэгшэд Хүндэлэлэй үнэмшэлгөөр шагнагдаба. Буряад Уласай Толгойлогшын июниин 27-ой зарлигаар улас түрын хуули ëһонуудые нарижуулан баталха хэрэгтэ үнэн сэхээр хүдэлһэнэй, мүн улас түрын дээдын засаг зургаанай ажалда эдэбхитэйгээр хабаадаһанайнгаа түлөө «Буряад уласай урда габьяагай түлөө» гэһэн медаляар спикер Цырен-Даши Доржиев, тэрэнэй орлогшонор Владимир Павлов, Вячеслав Ирильдеев, гадна депутадууд Борис Ботоев,
Александр Попов, Виктор Малышенко, Баир Гармаев, Светлана Будаева, Андреян Зыбынов гэгшэд шагнагдаа.
Буряадтаа албанам, - гээд шагналай үедэ Владимир Павлов тэмдэглээ һэн.
