Буряадай Арадай Хуралай сентябриин 22-то үнгэрхэ сесси дээрэ дүн хамта 51 асуудал харагдахаар оробо. Гурбан асуудал «Засагай Газарай сагай» үедэ зүбшэгдэхөөр баталагдаа. Тиигэжэ зарим депутадууд 2016 ондо мүнгэн һангаа улам наринаар ашаглаха тухай асуудал оруулан байна.
Мүнгэн һанда хамаатай үшөө нэгэ асуудал «Единая Россия» фракциин зүгһөө оруулагдаба. Тэрэнь, урьһаламжын талаар болоод аймаг нютагуудай тэнсүүгүй байдал хаража үзэхэ тухай. Тэрэшэлэн единороссууд малтамалнуудые ашаглалгын һалбариие хүгжөөхэ тухай асуудал мүн лэ оруулаа. Эдэ асуудалнуудаарнь Буряад Уласай Засагай Газар тоосохо жэшээтэй гээд тэмдглэе.
Гэхын хажуугаар, хуралдаанай үзэмжэдэ: 2015 ондо мүнгэнэй эрьесэ тухай хуулиин түсэл, Арадай Хуралай депутадуудые һунгалта тухай, архиин зүйлнүүдэй эрьесэ тухай, улас түрын һүлдэ тэмдэг тухай, 2017 ондо наһанайнгаа амаралтада гараһан зоной ажамидаралгын хэмжээн тухай, хаалтада татагдаһан унаануудые тусхай зорилгото газарта абаашаха гурим тухай гэхэ мэтын асуудалнууд оруулагдаа.
Коммунист Баир Цыреновай үүсхэлээр июниин сесси дээрэ табигдаһан аад, болигогдошоһон Буряад Уласай Толгойлогшо тухай хуулида заһалта оруулхай тухай түсэл энэ сессиин үедэ мүн лэ зүбшэгдэхэ. «Буряад Уласай Толгойлогшо тухай» хууляар уласай толгойлогшын һара бүриин салин юрын зоной бага зэргын салин хүлһэнэй хэмжээнһээ 30 дахин ехэ байгаа һаа, гаргашанууыень хизаарлаха тухай тэрэ түсэлөөр дурадхагдана гээд һануулая. Дансалагдаһанай ёһоор, 2015 ондо дунда зэргын салин улас түрэ дотор 28278 түхэриг бүридүүлээ гэбэл, доодо зэргэнь – һарын 6 мянган түхэриг, үгышье һаа бүхэли жэлэй 72 мянган түхэригэй олзо болоно. Гэхэ зуура, Толгойлогшын салин энэ хугасаа соо жэлэй табан сая түхэриг гэхэ гү, али 70 дахин ехэ мүнгэ бүридүүлһан байна.
