Буряад Уласай Арадай Хурал хоёрдохи уншалгаар 2010 он болотор ёһо бусаар баригдаһан гэрнүүдые дансатай болгохо тухай хуулиин түсэл дэмжэбэ. Тэрэнэй ёһоор гэрэй эзэн гэһэн гэршэдэ үшөө 1,5 мянган хүн хүртэхэ һанаатай. Иимэ удхатай хуулиин түсэл Арадай Хуралай ээлжээтэ сесси дээрэ Буряад Уласай Зөөриин ба газарай харилсаанай яаман-сайдай уялгануудые дүүргэжэ байгааша Марина Коротич мэдээсэн оруулһан байна.
- Ямар нэгэ эрилтээр хизаарлагдаһан газар дээрэ гэр бариха гээ һаа, эрхэтэдэй ами наһанда харша бэшэ, хэнэйшье эрхэ һанаа эбдэнэгүй г.м. барилгын бүхы дүримүүдые баримталха шухала, - гээд Марина Коротич дуулгаба.
Мүнөө эзэмдэһэн гэр байраяа бүридхэлдэ оруулха гэбэл, хуулиин ёһоор газар хэрэглэһэн тухай ори ганса данса саарһа оруулха болоно. Харин энээнһээ урагша энэ хэрэгээр орёо хэдэн дансануудые бэлдэхэ саг ерэгшэ һэн. Тэрэ тоодо депутадууд заабол прописка хэрэгтэй гэжэ эрилтые буруушаагаа.
Газарай участогай тон бага хэмжээн дүрбэн сотка болотор агшаагдаа, тэрэшэлэн дансануудые оруулха болзор 2020 он болотор һунаагдаа. Арадай Хуралай Газарай асуудалнуудай, хүдөө ажахын ажаябуулгын болон эд хэрэглэмжын дэлгүүрэй талаар хорооной түрүүлэгшэ Александр Поповай нэмэһээр, абтаһан хуулиин түсэлэй ёһоор участогай оршоһон газар, мүн хараада абтаха дансануудай бүридэл тухай эрилтэнүүдые анханайхяар бэшэгдэһэн зандань үлөөхэ гэжэ дурадхагдаа. Тус Хуули һаяын сагта хүсэндөө орохо.
