Буряад уласай 2035 он болотор ажабайдалай хүгжэлтын заршам хүтэлбэр түрүүшын уншалгаар абтаад байһанаа, дахин харагдажа буруушагдаад, хожом нэгэмүһэн хоëр уншалгаар абтаха болобо. Мэдээсэлэй Восток-Телеинформ агентствын сурбалжалагшада Арадай Хуралай Эдэй засагай хорооной түрүүлэгшэ Анатолий Кушнаревай дуулгаһаар, энэ хэрэг ээлжээтэ, февралиин 28-да зарлагдаха хуралдаан дээрэ бэелүүлэгдэхэ.
Тэрэнэй хэлэһээр, үнөөхи дансада гүрэн түрын эмхи зургаануудай зүгһөө олон ондоо асуудалнууд гаража эхилээ. Тиигээдшье, Буряад уласай Тоололгын палата, мүн прокуратурашье асуутай үлөө. Гадна, депутадууд, олзо эрхилэгшэд, байгаалиин ариг сэбэрые сахигшад, ниитыншье эдэбхитэд өөрын дурадхалнуудые тэрээндэ багтааха хүсэлтэй. Дүн хамта 60 гаран заһалта, мүн бэшэгдэһэн 100 гаран дурдахал энэ сагта ороод байна.
- Дан олон заһалта хубилалтанууд бии болошоо. Тиихэдээ тэрэмнай хуули бэшэ болоһондол удхатай. Эгээл тиимэһээ шэнээр тэрээниие зохëохо шухала. Тиигээдшье февралиин хуралдаан дээрэ бусадш заһалтанууд дурадхагдаха байха, - гээд Кушнарев тэмдэглээ.
Тоусхайлбал, ганса академик Арнольд Тулохонов Байгал далайда хабаатай аяар 25 дурадхал оруулаа. Бусадшье эдэбхитэд Байгал тухай һанамжануудаа дамжуулһан байха юм.
Мүнөө болоходо тэдэ бүгэдые дансада багтаахань таагүй болоо. Тэрээн зуур бусадшье һанаа хүсэлнүүд бии болоо. Буряад уласнай – Ородой онсо регион, Байгал далайгаа хүгжэлтын гол дансадаа заабол оруулха ëһотойбди, - гээд депутат хэлэхэ юм.
