Зургаадахи зарлалай Арадай Хуралай түрүүшын хуралдаан сеньтябриин 19-дэ 10 сагһаа эхилхэ тухай зарлигта Буряад Уласай толгойлогшо Алексей Цыденов гар табиба.
Восток-Телеинформ агентствын урид дуулгаһаар, ээлжээтэ зарлалай Арадай Хуралда заншалта ëһоороо дүрбэн намые түлөөлһэн 66 депутат ороо. Уласай парламентын гуримаар, түрүүшын суглаае эгээл наһажаал депутат нээдэг. Энэ удаа тиимэ хүн – Матвей Гершевич.
Энэ хуралдаан дээрээ депутадууд хороонуудай бүридэл элирүүлхэ, мүн спикер болоод тэрэнэй орлогшонорые һунгаха. Арадай Хуралай түрүүлэгшээр Цырен-Даши Доржиевай орондо Владимир Павлов һунгагдажа магад гээд хүлеэгдэнэ. Энээн тухай өөрын захим хуудаһан дээрээ единоросс депутат Михаил Гергенов соносхоо, тиигээдшье хожомынь бусад газарнуудһаа тэрэ һураг дуулдаа. Жэшээнь, КоммерсантЪ сонин баһал тэрээн тухай бэшэһэн байха юм: «Урда зарлалай спикер Цырен-Даши Дорожиев парламентда дахин орожо шадаа, гэбэшье, праймеризай дүнгүүдээр тэрэ партиингаа тоглолтоор бэшэ, нэгэ мандатдай тойрогоор һунгагдаа. Тиимэһээл өөрынгөө тушаал эзэлхэгүй ха», - гээд «Ъ» бэшэнэ. - Арадай Хуралда бусадшье мэдээжэ депутадууд зууршалагдаагүй, тэрэ тоодо 2015 ондо улас түрын толгойлогшо байһан Вячеслав Наговицинтай эбгүй байһан, мүн дүтэ байгааша спикерыень тушаалһаань буулгахада хабаадалсаһан дид-спикер Бато Семеновые нэрлэмээр. 2017 ондо уласай толгойлогшоор һунгагдаһан Алексей Цыденовта таатай политик спикер болохо байха. Цыденовтай «Буряадай команда» гэһэн уряа доро дэбжүүлэгдэгшэ, «Единая Россия» намай тоглолдо түрүүшын табан хүнэй тоодо орогшо, партиингаа нютаг мужын таһагай секретарь Владимир Павлов үндэр тэрэ тушаалда дэбжүүлэгдэжэ магад. Тэрэнэй орлогшонорой нэгэн Буряад Уласай Толгойлогшын болон Засагай Газарай захиргаанай хүтэлбэрилэгшын орлогшоор, нютаг нугануудай хүгжэлтын хорооной түрүүлэгшэ ябаһан Баир Жамбалов боложо болохол ха.
