Буряад Уласай Толгойлогшо «Битва за миллиард» гэһэн шоу-нааданда хабаадажа магад. Мүнөөдэр, мартын 15-да Алексей Цыденовай мэдээсэһээр, Буряадай Засагай Газар «Тэрбүүмэй түлөө тулалдаан» гэһэн гаршагтай урилдаан наадандай дүримүүдые хүлеэжэ байна. Тэрэнь энэ сагта үшөө соносхогдоо үды, гээд Восток-Телеинформ дуулгана.
Харажал, хүлеэжэл байнабди. Хэрбээ нааданай удха дүримынь ойлгомоор, ганса нэгэндэ тааруу бэшэ, харин бултанда эли тодо, нээмэл маягаар зохёогоотай байбалнь бидэ хабаадахабди, - гээд Цыденов һанамжална.
Телевидениин шэнэ энэ түсэлдэ орон можонуудай толгойлогшод хабаадаха зэргэтэй, гээд холын хараа шэглэлэй агентствын «Новый бизнес» һалбариин захирал Артем Аветисян Оросой Холбооной юрэнхылэгшэ Владимир Путинай хабаадалгатайгаар Самара хотодо үнгэрһэн тусхай зүблэлэй суглаан дээрэ мэдээсэбэ, гээд ТАСС бэшэһэн байна. Тус түсэлэй ёһоор, губернаторнууд өөр өөрын нютаг можонуудай арга боломжонууд тухай хөөрэхэ юм.
Энэмнай хани нүхэдэй харилсаанай, мүн урилдаанай маягаар үнгэргэгдэхэ. Юрэнхыдөө, инвесторнуудые татаха хаба шадалаараа туршалсаан мүн болоно. Юуб гэхэдэ, орон можонуудай засаг зургаануудые өөрын хүсэ шадал һайса шэнжэлжэ, хоорондоо харилсаа бэхижүүлхэ арга нүхэсэлнүүдые бэелүүлхэ хүсэлнүүдһээ энэ эхитэй. Тиигээдшье, бүхы гүрэн дотороо бэеэ харуулха аргаолгогдохо жэшээтэй, - гээд Аветисян хөөрөө.
Телепроектын шагналай жаса гээ һаа, бүхэли тэрбүүм бүридүүлхэ. Түсэлэй эхин хэзээб гэжэ дуулгагдангүй. «Тэрбүүмэй түлөө тулалдаанда» Эрхүү можын губернатор Сергей Левченко хабаадаха тухайгаа мүн лэ хаража туршаха гээд хүршэ можын хэблэлэй албан дуулгаба.
