Буряад Уласай Арадай Хуралай табадахи зарлалай һүүлшын 30-дахи хуралдаан июниин 28-да түгэсэбэ. Парламентын спикер Цырен-Даши Доржиевай тэмдэглэһээр, үнгэрэгшэ табан жэлэй туршада һунгамалнууд улас түрын хэмжээнэй аяар 900 гаран хуули ëһо баталан абаа, тэдэнэй 85-ниинь шэнээр зохëогдоһон үндэһэ табиһан хуули мүн, гээд Восток-Телеинформ дуулгана.
Тиин абахада, улад зоной байра байдал гуримшуулһан удхатай хуулинууд булюу олонхииень бүридүүлнэ – 25, гүрэн түрын байгууламжа гуримшуулһан – 19 хуули, эдэй засагта болоод мүнгэ һангай һалбарида хабаатай – тус тустаа 15, олоной хоорондын харилсаа гуримшуулһан – 6, мүн тиихэдэ хүдөө ажахын хүгжэлтэ хараалһан – 5 хуули ëһо абтаһан байна.
Һүүлшын хуралдаан дээрээ һунгамалнууд 33 асуудал зүбшэн хэлсээ, тэрэ тоодо улас түрын толгойлогшын 2017 оной дүнгүүд тушаа тоосоон шагнагдаа. Спикерай тобшолһоор, тэрэ тоосоон дотор инвестицинүүдэй хэр татагдаһан тухай харуулагдаа, 2016 онойхитой зэргэсүүлбэл, һураггүй ехэ инвестици татагдаа ха.
Мүнгэ һангай талаһаа зэргэсүүлбэл, һүүлэй табан жэлэй туршада 40-һөө 50 миллиард хүрэтэр тэрэ дээшэлээ. Улас түрыншье өөрын олзо орошо, зүгөөр мүнгэн туһаламжыншье хэмжээн ургаа, - гээд Цырен Доржиев хөөрэхэ юм. – Нэгэ жэлдэ уласай мүнгэн һан тухай тоосоо арай шамай гэжэ баталаа бэлэйбди. Тиигэхэшье баатай байгдаа. Яагаа хээгээшье хадаа гүйсэдхэхы болоод хуули баталан абаха засаг зургаанууд хоорондоо үгэеэ ойлгосолдожо хүдэлхэ ëһотой, бэе бэеэ хинажа, адаглажа, заһажа хүдэлхэ зэргэтэй бшуу.
Табадахи, эгээл энэ зарлал эдэй засагаа хүгжөөхэ талаар хэдэн хуули ëһо баталба. «Эдэй засагай бодото байдал, манай үйлэдбэрилхы һалбари, бага болон дунда зэргын олзо эрхилэлгэ зохистой хуули ëһонуудые хэрэглэн хүгжэн һалбаржа байха аабза гээд найдагдана, ажалай һууринуудшье олошорхо, Буряад уласай бүрин бүгэдын мүнгэн санда нэмэри олзо оршонууд орожол байг», - гээд Доржиев тэмдэглэнэ һэн.
