Ородой Холбоото Уласай Үйлэдбэриин ба худалдаа наймаанай сайд Денис Мантуров Буряад орондо нэбтэррүүлэгдэжэ байһан инвест-түсэлнүүдые ехэ дэмжэнэ. Улаан-Үдын авиазаводай бизнес-түбтэ олзын хэрэн эрхилэгшэдтэй тэрэ июниин 8-да уулзаһан байна. Нютагай олзо эрхилэгшэдэй дунда улас түрын томо-томо компани нэгэдэлнүүд тэндэ дурадхагдаа гэбэл, Сэлэнгын ЦКК, «Ажур-текс», БЛК, Улаан-Үдын авиазавод, ЛВРЗ, «Тимлюй цемент», «Байгалай аршаан юулгын завод», «ДРД» болон бусад.
- Мүнөөдэр олзо эрхилэгшэдтэй хөөрэлдэхэ арга олгогдоо, целлюлоза-саарһанай комбинадһаа эхилээд, худалдаа наймаан болотороо бусад ондоо һалаа һалбаринуудта хабаатай асуудалнууд хэлсэгдээ. Элдэб бизнес хэрэгүүдэй түлөөлэгшэд өөр өөрын һанамжа бодолнуудаар хубаалдаа, дурадхал, үүсхэлнүүдые оруулаа. Эдэ дурадхалнууд Буряад уласай олзо эрхилхэ хэрэгтэ бодото дээрээ нэбтэрүүлэгдэхэ аабза гээд этигэнэб. Хүндүүлхэй асуудалнууд үнэхөөрөөл олон, хэр тиигэбэшьень тус тустань мэргэн шиидхэбэри олдохол байха гэжэ бодомжолон хараалнаб, - гээд сайд хэлэхэ юм.
Өөрын талаһаа улас түрын толгойлогшо Алексей Цыденов, Буряад уласта омогорхохо юумэн элбэг, гээд тэмдэглэбэ. «Олзо эрхилдэг эрхимүүд олон. Сэлэнгын ЦКК Орос гүрэн дотороо эгээл шанартай картон гаргадаг, имагтал иимэ жэшээ бэшэ тээ үгы. Прибор бүтээлгын нэгэдэл хоëр һарын туршада хубиин тоосооной приборнуудые үйлэдбэрилжэ захалаа. «Ростелеком», «Россеть» гэхэ мэтын бүлгэмүүдтэй тусхай хэлсээнүүдые баталанхай. ЛВРЗ нëдондо үндэр амжалтануудые туйлажа, һайн дүнгүүдые харуулаа», - гэжэ Цыденов тэмдэглэбэ.
Тэрэшэлэн, нютагай олзо эрхилэгшэд өөр өөрын туйлалтанууд тухай зураглан дуулгаа. Хаамал түхэлэй «Байгалай ой модоной бүлгэмэй» зарлал Евгений Пруидзэ Яруунын, Байгал шадарай аймагуудта ой модо болбосоруулгын эмхинүүдые байгуулха талаар түсэлөө дурадхаа. Тэрэнь Ородой Үйлэдбэриин болон худалдаа наймаанай яаманай түрүү ээлжээнэй тоодо оруулагдаба. «Байгалай ой модоной бүлгэмэй» үйлэдбэриин эд хари гүрэнүүд – Япон, Холбоото Штадуудай, Хитад уласуудта худалдагдана.
