Ородой Холбооной Юрэнхылэгшын Сибириин федеральна тойрогтохи бүрин эрхэтэ түлөөлэгшэ Сергей Меняйлын дэргэдэхи аюлгүй байдал сахилгын Зүблэлэй суглаан Кемерово хотодо һаяхана үнгэргэгдэбэ. Тэндэ түймэр сарагшадай бэеэ һамааруулгын «Зимняя вишня» мэтэ олоной үймөөтэй эмхи гуламтанууаар хаа хаанагүй ябуулһан шалгалтануудай дүнгүүд тушаа тодорхойгоор хөөрөө. Энэ сагта 10 мянга гаран эмхинүүдэй 4500-ниинь шалгагдаа. 80 %-нь элдэб хазагайруулга элирүүлэгдэһэн байна. Прокуратурые үзэмжэдэ 36 материал дамжуулагданхай гэбэ. «Мүрдэлгын дүнгүүдээр сэгнэлтэнүүд хэгдэхэ», - гээд үндэр тушаалтан хэлэхэ юм.
Бага болоод дунда хэмжээнэй олзын хэрэг эрхилэгшэдтэ «үргэн зам нээхэ» һэдэлгэһээ засаг зургаанууд тэдэниие зоргон соонь, хиналтагүй орхижо айдхартай ушарта баһал зэмэтэй. Хайран, гэмгүй зон олоор хосороо, гэжэ һанаа алдан, тэрэ тэмдэглээ.
Буряад уласта олоной үймөөнэй газарнуудта үнөөхи шалгалтанууд апрель һарада үнгэргэгдөө. Харин удангүй дүрим хазагайруулагдаһан ушарнуудаар дабхар шалгалтанууд эмхидхэгдэхэ. Апрелиин 23-да уласай Засаг Газарай ажалаа түсэблэлгын суглаан дээрэ Буряад Уласай Засагай Газарай түрүүлэгшын Аюулгүй байдал сахиха талаар орлогшо Петр Мордовской энээн тухай элидхэл хэһэн байна.
Улас түрын дэбисхэр дээрэ дүн хамта 219 эмхи шалгагдаа, тэдэнэй 42-нь бэеэ һамааруулгын углуу таһагтай худалдаа наймаанай газар, хүүгэдэй сүлөө сагай 24 эмхи, соëлой 38 эмхи, тамирай 24 түб, олоной үймөөнэй бусад 91 эмхи шалгалтада оруулагдаһан байна. Шалгалтын дүнгүүдээр тэдэнэй оройдоол 43-нь гэхэ гү, али 19,6 %-нь түймэр сарагшадай эрилтэнүүдтэ таарана. Хамта дээрээ дүрим хазагайруулһан 1628 ушар элирүүлэгдэбэ, 300-нь тэдэ усадхагдаа.
