Байгал далай хамгаалха талаар улас түрын зиндаагай хараа хүтэлбэрэй болзор һунааха тухай дурадхал Ородой Холбооной Уласай Засаг Газарай түрүүлэгшын орлогшо Александр Хлопониной нэрээр дамжуулагдаа, гээд Гүрэнэй Дүүмын фракцинууд хоорондын «Байгал» гэһэн бүлэгэй суглаан дээрэ Эрхүү можын һунгамал Сергей Тен соносхобо. Мүнөө сагта «Байгал далай хамгаалга болон Байгал тойрон ажаһуугааша улад зоной байра байдал һайжаруулха» тухай үнөөхи хүтэлбэр 2012 – 2020 онуудта хараалагданхай. Юрэдөө, тэрээниие бэелүүлхэ хэрэгтэ 26 миллиард түхэриг һомолоотой юм.
Хлопониной зүбшэхы албанда тэрэ хандалга бүридхэлдэ абтаатай, харюуниинь хожом дуулгагдаха гэжэ һурагтай.
Эрхүү можо, Буряад Улас хоëрые улас түрын «Байгал далай хамгаалха» зорилгото хүтэлбэрые мүнгөөр хүсэд хангахын түлөө хамта тэмсэе гээд нëдондоной эсэстэ Сергей Тен уряалаа бэлэй гээд һануулая. Анха түрүүн Эрхүү можо 41 миллиард, Буряад Улас 38 миллиард түхэриг энэ хэрэгтээ эреэ һэмди гээд тэрэ тэмдэглээ һэн.
Буряад Уласта гүрэн түрын тэрэ хүтэлбэрэй бэелүүлэгдээ һаа уһануудые шүүжэ сэбэрлэдэг түхеэрэлгэнүүд, мүн бог хаядаһа болбосоруулгын япон үйлэдбэриин завод баригдаха жэшээтэй. Гансал ФЦП-гэй һунаагдабал эдэ хэрэгүүд бүтэхэ янзатай. Харин тус асуудал шиидхэгдээ үды. Буряадай Толгойлогшо Алексей Цыденовай тэмдэглэһээр, завод бариха тухай хэлсээн хээтэй, теэд мүнгэниинь үгы. Мүнгэн гээ һаа, үнөөхил хүтэлбэрэй һунаагдаха, үгыһөөнь дулдыдаха. Буряад Уласай һан энээниие даажа бирахагүй, тиимэһээ гүрэнэй хүтэлбэрэй саашанхи хуби заяан ямар байха хаб гээд хүлеэгдэнэл гээшэ.
