Буряад Уласай Барилгын болон Гэр байрын ажахы нарижуулгын сайдай орлогшо Сергей Рыбальченко 140 А кварталда хубиин гуримаар гэрнүүдые барилгада хабаадалсажа байһан зонуудтай уулзажа, барилгые дахяад эхилхэ талаар ямар арга нүхэсэлнүүд бииб гэжэ зүбшэн хэлсэбэ. Уулзалгада Гүрэнэй гэр байра барилгын хиналтын албанай, Улаан-Үдын захиргаанай Барилгын хорооной болон Эдэй ба газарай харилсаанай хорооной түлөөлэгшэд хабаадалсаа.
Мүнөө сагта Улаан-Үдын Октябрьска районой 140 А кварталда ябуулагдажа байһан үсөөн дабхартай гэрнүүдые барилгын 2-дохи ээлжээн зогсоогдонхой, гээд тэндэ байһан зон хүлгөөтэй. Хизаарлагдамал харюусалгатай «Тамир» гэһэн бүлгэм барилга анхан эрхилжэ байгаа, теэд панхаруутаһан ушарһаань барилгань тогтошоо юм байна. Сүүдтэ панхаруутаһан тухайнь хэрэг шиидхэгдэхэ янзатай. Хубиин гуримаар барилгада хабаадалсаһан зон өөрын мэдэлэй барилгын кооператив эмхидхэжэ, ажал һэргээхэ һанаатайл ха.
Гэрнүүдые ашаглалгада тушааха гуримшье зохëогдобо. Тэрэнь гурбан шатаһаа бүридэнэ. Зарим гэрнүүдые намарай эхин тээшэ тушаахаар байна, нүгөө заримыень 2018 оной эсэстэ хүсэндэнь оруулмаар. Харин удаадахи, долоодохи гэрыень хүсөөхэ гээшэ хэсүү. Тэрэнэйнь һаял 10 хубинь бодхоотой. Тэндэ мүнгэеэ оруулагшадые 4,5,6 – дахи гэрнүүдтэ багтааха аргануудшье хэлсэгдэнэ.
Барилгада таһалаатай газарнууд Буряад Уласай ипотекын корпорациин нэрээр арендада юм ха. Зээлеэр гэр барюулгада хабаатай гэхэ мэтын бусад асуудалнууд Буряад Уласай Засагай Газарай тусхай комиссиин зүблөөндэ һаядаа харагдаха байха.
