Арадай Хуралай Газарай асуудалнуудай, хүдөө ажахын болон эдэй дэлгүүрэй талаар хорооной түрүүлэгшэ Александр Попов Новосибирск хотодо уласхоорондын һуралсалай «SA&RUD» түсэл зүбшэлгэдэ хабаадалсаба. Тэндэ «Ородой ба Казахстан уласуудай хүдөө нютагуудые алдангүй хүгжөөхэ» гэһэн гаршагтай магистр зиндаагай заршам хүтэлбэр тухай хөөрэлдөөн болоһон байна.
Буряад уласай түлөөлэгшэдэй бүридэлдэ Буряадай гүрэнэй хүдөө ажахын академиин багшанарһаа гадна аяншалгын АССО-ТУР хамтаралай мэргэжэлтэд оруулагдаһан байгаа. Юуб гэхэдэ, хүдөө нютагаар аяншалгын һалбариин тусхай хүтэлбэр баримталан хүдэлхэ хараа бодолнууд эндэ хараалагданхай бшуу. Түсэл бэелүүлгэдэ Ородой Холбооной, Казахстанай, Германиин, Чехиин, Польшын гэхэ мэтэ уласуудай дээдэ һургуулинууд хабаадуулагдаха юм ха. Тэрэ тоодо Буряадайшье хүдөө ажахын академида тэрэ түсэл хабаатай.
- Магистр зиндаагай тус хүтэлбэрэй гол шэглэл гээ һаа – һалбари бүхэнэй арга нүхэсэлнүүдые баримталга мүн. Тиин, эдэй засагай, ариг сэбэрэй, уладай байрада хабаатай асуудалнууд шэнжэлэгдэхэ юм байна. Минии һанахада, иимэрхүү заршам аймаг нютагуудай албатанда угаа тааруу байха аабза, юуб гэхэдэ, хүдөө нютагуудые хүгжөөхэ гэбэл, хамаг һалбаринуудые илгаагүй хараада абаха шухала бшуу, - гээд Александр Попов тэмдэглээ.
Бүтэн бүриндэнь дабшуулха жэшээ гэжэ хаамал түхэлэй «Племзавод Ирмень» бүлгэмэй үндэһэн дээрэ харуулагдаба. Тэрэ эмхидэ мүнөөнэй арга нүхэсэлнүүд аша үрэтэйгээр хэрэглэгдэнэ. Тиимэһээл туйлагдаһан амжалтанууд гайхалтай: нэгэ үхэрэй 11800 литр һүн, 40-45 центнер ороһото зүйл гектра газарһаа абтана. Үдэр бүри энэ ажахыһаа Новосибирск руу 80 тонно һүн эльгээгдэжэ байдаг байна. Тиигээдшье, үйлэдбэриин хажуугаар худалдаан наймааниинь урагшатай. Тиимэл хадаа тус ажахы бата шадалтай, хүсэд хүгжэнги гээд тоотой.
