Улаан-Үдэ болоод Северобайкальск хотонуудые тойроод ой модоной ногоон бүһэ байгуулха талаар асуудал Арадай Хуралай депутадууд хабаатай яаман зургаануудай, Буряад Уласай Ниитын палатын, «Хотын ойн ажахы» эмхиин, мүн Улаан-Үдын захиргаанай түлөөлэгшэдэй хабадалгатайгаар зүбшэн хэлсэбэ.
Гүрэн түрын ой модоной реестрэй баримтануудай ëһоор, Улаан-Үдые тойроһон ногоон бүһэ 273,8 мянган га, тиихэдэ ой паркнуудай талмай – 26,1 мянган га талмай эзэлдэг байна. Эгээл энэ газар «Хотын ойн ажахы» гэһэн эмхи зургаанай мэдэлдэ оруулагданхай. Гэхэтэй хамта, хотын паркнууд болон сквернүүд ямарш эрхэгүй, хэнэйш мэдэлэй бэшэ үлэшэнхэй юм байна. Ушар тиимэһээ аршалха, шэнэлэн һэргээхэ хэмжээ ябуулгануудые хэжэ байха хүн үгы.
Гэхэ зуура, 2017 оной январиин 1-дэ Ородой Холбооной «Оршон тойронхиие хамгаалха тухай» хуули хүсэндөө орожо, гүрэн дотор «ой модоной паркнуудай ногоон бүһэ» гэһэн ойлгосо анха түрүүшынхиеэ оруулба. Энэ дэбисхэр дээрэ байгаалиин баялиг хэрэглэлгэ хизаарлагдаха жэшээтэй. Тэндэ гансал бэеын тамир элүүржүүлгын түхеэрэлгэнүүд байжа болохо. «Ногоон бүһын» хилын баталагдаһанай удаа, талмайень бага болгожо болохогүй. Отологдоһон модонуудай орондо заабол шэнэ модонуудые һуулгаха хэрэгтэй. Хуулиин хараалһаар, иимэ бүһэнүүдэй тоодо муниципальна байгуулалтануудые тойронхи ой модон ганса бэшэ, харин хото тосхонгуудай улад зоной амаралтын паркнууд болон сквернүүд оруулагдадаг болохо ëһотой.
