Түймэрэй һүжэрхэ хаһа апрелиин эхинһээ нээгдэнхэй. Тэрэ гэһээр, дүн хамта 593 гектар талмайда ойн 54 түймэр бүридхэгдөө, гээд Уласай ой ажахын агентствын хүтэлбэрилэгшэ Александр Мартынов соносхобо. Нëдондо энэ сагта 80-һаа дээшэ түймэр соробхилжо байгаа, тэдэнэй эзэлһэн талмай аяар 41 мянган гектар үлүүтэй һэн.
2017 онойхидо орходоо ойн түймэр саралга эрид түргэдөө. Энэ жэлдэ түймэрнүүдэй 98 хуби түрүүшын лэ үдэр унтараагдана. Нэгэл түймэр энэ болзор соо үрдигдөөгүй, сүүтхэ хахад саг эзэлээ, гээд Мартынов дуулгаба.
Тэрэнэй хэлэһээр, урдахи жэлнүүдтэй сасуулхада зарим тэды арга боломжонууд һэлгэгдээ. Тиигэжэ, Буряад Уласта федеральна зиндаагай мэдэлэй хүсэнүүдые хабаадуулалтагүй гэһэн шиидхэбэри абтаһан байна. Ушарынь, үлүү ехэ үнэтэй. Тэрэнэй орондо өөрын бүхы нөөсэнүүд хэрэглэгдэдэг болобо. Хэрэг гарабал, нютаг нютагһаа дары хаялсабал аша үрэтэй байна.
Зарим тэды мэргэжэлтэдэй, шэнэ оньһон техникын дуталдахань, байгаашань хуушараа гэхэ мэтэ бэрхэшээлнүүд энэ һалбарида үзэгдэһэн зандаа. Эрхэ байдал эрид һайжаруулхын тула Ойн кодексдо сагай эрилтэнүүдтэ таарама хубилалтануудые оруулха хэрэгтэй, гээд депутат Валерий Цыремпилов тэмдэглэнэ. Энэ мэтын асуудалнуудые Орос Уласай хэмжээндэ соносхохыень Гүрэнэй Дүүмын, Федерациин Зүблэлэй депутадуудта Цыремпилов хандаба.
