Буряад Уласай Арадай Хуралай нютаг можо хоорондын холбооной, үндэһэ яһатанай асуудалнуудай, залуушуулай түрын, ниитын болон шажан мүргэлэй нэгэдэлнүүдэй талаар хорооной ажалай зүблөөн дээрэ үсөөн тоото үндэһэн арадуудай омоли загаһа хэды шэнээниие барижа болохо тухай асуудал харагдаба.
Хорооной түрүүлэгшэ Цыденжап Батуевай тэмдэглэһээр, улас түрын хойто хизаарай нютагуудаар һая ябаха үедэ, үедэ оротон яһатанай омоли загаһаяа барижа амидарха эрхэнүүдэй хашагдаха тухай гомдолнууд нютагай улад зонһоо дуулдаа. Юрэнхыдөө, Буряад Уласта омоли олзоборилго мүнөө сагта хоригдонхой. Энээние хараалһан хуули 2017 оной октябриин 1-дэ хүсэндөө ороо һэн. Харин хойто хизаарай үсөөн тоото арадуудта амидаралай хэмжээнэй тухайе барижа болохо эрхэ үгтөө бэлэй. Буряад Уласай Хүдөө ажахын болон эдеэ хоолой сайдай орлогшо Петр Брыковай хэлэһээр, энэ жэлдэ тэрэ арадуудта дүн хамта 55 тоонно омуль бариха эрхэ үгтэһэн байна.
Харин хойто хизаарай үсөөн тоото арадуудай эблэлэй Северобайкальскын таһагай түрүүлэгшэ Галина Роговагай хэлэһээр, омоли барилга гансал тусхайтаар заагдаһан газарта зүбшөөгдэнхэй. Тиигээдшье, тэдэ газарнууд үрдилсөөнэй гуримаар бүридхэгдэдэг жэшээтэй. Хамта дээрээ 41 тиимэ газар тодорхойлогдоо һэн, теэд оройдоол 4-ниинь абтаа. Гэхэ зуураа, Галина Рогова анханайхяараа омоли загаһаяа бариха гуримдаа бусаа һаа дээрэ бэлэй, гээд бодомжолно.
Хаанаш гараад, омоли барижа байха гээшыень яаман зургаанай тушаалтад буруушаана. Тэдэнэй һанамжаар, оротоншье хадаа бусадтайл адли Ородой Холбоото Уласай эрхэтэн болоно. Тиимэһээ онсо эрхэнүүдые хараалһанай дэмы. Гэбэшье, загаһа олзоборилхо дүримүүдтэ хубилалтануудые оруулха хэрэг бии. Жэшээнь, хүсэд тайлбарилагдаагүйһөө боложо, арсалдаа асарааша «заншалта байдалай эрхэ», «загаһа бариха заншалта арга боломжо», «бэеэ хангаха олзоборилго» гэхэ мэтын ойлгосонуудые онсоор тодорхойлхо шухала, гээд Хүдөө ажахын сайд дүн согсолбо.
