Арадай Хуралай ээлжээтэй хуралдаан дээрэ Буряад Уласай «Буряад Уласта нютагай хүтэлбэри эмхидхэхэ тухай» хуулиин 22-дохи статьяда заһалтанууд оруулагдаба. Тиигэжэ, аймаг бүхэн толгойлогшоëо ямар аргаар: сэхэ һунгалтаар гү, али аймагай зүблэлэй депутадуудай дундаһаа шэлэхэ гү өөрөөл тунхагладаг болохонь. Хуралдаан дээрэ хуулиин энэ түсэлые улас түрын Толгойлогшын болон Засагай Газарай Түрүүлэгшын орлогшо – захиргаанайнь хүтэлбэрилэгшэ Баир Цыренов оруулһан байгаа.
Тэрэнэй мэдээсэһээр, аймагай толгойлогшые томилхо гурим аймагай захиргаанай устав дотор бэшэгдэһэн байха жэшээтэй.
Олонхи аймагуудта мүнөө баримталагдажа байһан сэхэ һунгаха гурим хуушан янзаараа үлэхэ байха, гээд депутат Сергей Мезенин бодомжохо зуураа:
Тааруу найдамтай бэрхэ хүнэй аймаг дотор олдоогүй һаань, яалтайб? Ниитын ямар нэгэ хүдэлөөнэй дурадхалаар гү, али гээ һаа толгойлогшынгоо гү, нютагһаа гараһан аха захатанай гү зууршалгаар хари тээһээ найдамтай хүниие үндэр тушаалда һуулгахада боломоор байжа магад. Зарим ушарта бэрхэтэй байдал хажуу тээһээ бүри тодоор харагдадаг шуу гэһэндэл, хариһаа бууһан хүн аймагай зоной байра байдал һэргээхэ шадалтай байжа болохо.
