Буряад Уласта хүдѳѳгэй хубиин ажахытануудта грантын тэдхэмжэ ехэ болгохо гэжэ түсэб табигдана. Энэ шиидхэбэри Арадай Хуралай гүрэнэй байгуулгын, нютагай өөhэдын хүтэлбэриин, хуули ёhоной болон гүрэнэй албанай асуудалай хорооной Бэшүүрэй аймагта үнгэрһэн зүблэлдэхэ суглаан дээрэ хэлсэгдэбэ гэжэ Восток-Телеинформ уласай парламентын мэдээсэлэй албанhаа дуулгаба.
Хүдѳѳ ажахын ба эдеэ хоолой яаманай сайд Даба-Жалсан Чириповай тэмдэглэһээр, иимэ тэдхэмжын арга хэмжээ хүдѳѳ нютагуудта хэрэг эрхилэлгэдэ аша туһатай байһанаа гэршэлээ. Мүнѳѳ Буряад Уластамнай 1899 хүдѳѳгэй хубиин ажахынууд бүридхэлдэ оронхой. 2012 онһоо 388 эхилэгшэ хүдѳѳгэй хубиин ажахытанууд ба 32 гэр бүлын фермэнүүд тэдхэмжэдэ хүртѳѳ. Хамта дээрээ гүрэнэй тэдхэмжын нѳѳсэ 590 млн түхэригһѳѳ дээшэ болоно.
- Гүрэнэй тэдхэмжын һайгаар фермернүүд материальна-техническэ базаяа һайжаруулаа, зариманиинь дээдэ хэмжээнэй хүгжэлтэдэ гаража шадаа. Мяханай ба һүнэй үйлэдбэрилгэ харуулһан тоо, хони ямаадай, бодото малай тоо тоогтууритай дээшэлнэ, - гэжэ сайд элирүүлбэ.
Бэшүүрэй аймагта хүдѳѳ ажахын үйлэдбэриин бүтээлнүүдые 86 хүдѳѳгэй хубиин ажахынууд ба хубиин хэрэг эрхилэгшэд гаргана гэжэ аймагай АПК-гай хүгжэлтын таһагай дарга Альбина Кондакова дуулгаба. 2012 онһоо 31 хүдѳѳгэй хубиин ажахынууд ба нэгэ мал үдхэлгын фермэ 66 млн. түхэригтэ грантнуудые абаа.
