Буряад Уласта олон үхибүүтэй гэр бүлэнүүдтэ газарай орондо барилгада гү, али гэр худалдажа абалгада мүнгэ үгэхэ гэжэ дурадхагдаба. Иимэ дурадхал Бэшүүрэй аймагта үнгэрһэн Арадай Хуралай гүрэнэй байгуулгын, нютагай өөhэдын хүтэлбэриин, хуули ёhоной болон гүрэнэй албанай асуудалай хорооной зүблэлдэхэ суглаан дээрэ оробо гэжэ Восток-Телеинформ гүрэнэй дээдын хуралай мэдээсэлэй албанһаа дуулгана.
Гүрэнэй ба нютагай захиргаанай зѳѳриин газар ганса бэеын зѳѳридэ түлбэригүйгѳѳр үгэхэ гэһэн уласай хуули бэелүүлгэ тухай Зүблэлэй гэшүүд зүбшэн хэлсэбэ. Хуулиин ёһоор хубаарида ороһон хэһэг газарнууд уһаар, зайн галаар ба харгынуудаар хангагданхай байха ёһотой болоно. Хүдѳѳ аймагуудта энэ асуудал элдэб аргаар шиидхэгдэнэ. Бэшүүрэй аймагта 2016 онһоо нэгэ мянгаад шахуу иимэ газарнууд үгтэнхэй, зүгѳѳр уһа, зайн гал ба харгы татаха хэрэг хүндэ бэшэ байгаа. Мүнѳѳ сагта эзэлэгдэйгүй үшѳѳ зуугаад хэһэг газарнууд бии. Хүнгэн бэшэ байдал ажахын хизаарлалгатай бүһэлүүртэ ороһон Байгал-Шадарай, Баргажанай, Кабанскын ба Хойто-Байгалай аймагуудта тохёолдонхой. Онсо тусгаар бэрхэшээлтэй байдал Түнхэнэй аймагта, юундэб гэхэдэ, эндэхи бүхы газарынь национальна паркын бүридэлдэ. Энэ асуудал гүрэн түрын хэмжээндэ шиидхэгдэхэ болоно.
Хэһэг газар абалгын ээлжээндэ Буряад Уласта 7037 гэр бүлэнүүд байна, тэдэнэй тоодо 4277 айлнууд -Улаан- Yдэ хотодо. Газарай талмайнууд хизаарлагданхай байһан дээрэһээ, олон үхибүүтэй гэр бүлэнүүдтэ хэһэг газар хубаалга бэрхэтэй орёо асуудал болонхой. 2019-2021 онуудта, юрэдѳѳл, 100, 90 ба 80 газарай талмайнууд үгтэхэ гэжэ түсэблэгдэнхэй.
