Буряад Уласай Арадай Хуралай депутадууд Хүдөө ажахын болон эдеэ хоолой яаман-сайд Даба-Жалсан Чириповые Засагай Газарай Түрүүлэгшын агро-үйлэдбэриин һалбариин ба хүдөө нютагуудые хүгжөөхэ талаар орлогшын тушаалда зүбшөөбэ. Чириповые Буряад Уласай Засагай Газарай Түрүүлэгшын орлогшо, Толгойлогшын захиргаанай хүтэлбэрилэгшэ Петр Носков дэбжүүлэн танилсуулаа. Тэрэнэй хэлэһээр, Чирипов АПК-гай һалбарида нилээд удаан хүдэлжэ, аргагүй ехэ дүй дүршэлтэй болонхой, тиигээдшье Хурамхаанай аймагай толгойлогшоор урагшатайгаар хүдэлһэниинь мэдээжэ.
Даба - Жалсан Чирипов Буряад Уласай агро-үйлэдбэриин һалбариие һэргээхэ арга боломжонууд тухай тодорхойгоор элидхээ:
- Шухала зорилгонууднай гээ һаа – арад зоноо эдеэ хоолой гол зүйлнүүдээр дүүрэн хангалтын хэмжээндэ 10-15 жэлэй туршада гаргаха хэрэг бии. Тиихын тула томо үйлэдбэринүүдые хүгжөөхэ ябуулгаяа дам үргэлжэлүүлхэ шухала, энэ хэрэгтэ инвестици таталгые улам эршэдүүлхэ, мүн хүдөө ажахын эмхинүүдые үшөө олоор бодхоохо хэрэгтэй бшуу. Тэрэшэлэн, энэ һалбарида хүдэлдэг зонойнгоо ажабайдал һайжаруулха, мүнгэ салингыень дээшэлүүлхэ амин шухала, - гээд Чирипов тэмдэглээ.
Энээнһээ гадна, Хүдөө ажахын яаман-сайд депутадуудай асуудалнуудта харюусаа. Тэрэ тоодо, хүдөөгээрхидэй хото зөөхэ ушарнуудые яажа үсөөрүүлхэб гэһэн асуудалда:
- Нютагтань амгалан ажаһууха бүхы боломжонуудые түгэс хүсөөхэ хэрэгтэй. Хүдөөгэй зон хотынхидһоо юугээршье гарзатаха ёһогүй. Нютагтаа үлөөд ажалладаг зоной нэрэ хүндые дээшэлүүлхэ гээшэ мүн лэ шухала, - гэжэ Чирипов харюусаба.
Засагай Газарай Түрүүлэгшын орлогшын тушаал эзэлхэ хүниие Улас түрын Толгойлогшо дэбжүүлдэг ёһотой, зүгөөр депутадууд өөрын талаһаа зүбшөөхэ-болихоёо нюуса һунгалтын аргаар мэдүүлдэг гуримтай гээд эндэ һануулая.
Тобшо мэдээн: Даба – Жалсан Чирипов 1962 оной зургаа һарын 7-до түрэһэн. 1984 ондо «Түүхын, олониитын байдал шэнжэлэлгын эрдэмэй болон зүблэлэй эрхэ уялганууд» гэжэ мэргэжэлээр Буряадай гүрэнэй багшын дээдэ һургуули дүүргэбэ. 2006 ондо Зүүн-Сибириин гүрэнэй технологиин университет юрист мэргэжэлээр дүүргэһэн байна.
