Буряадай Арадай Хуралай һунгамалнууд Россиин Президент Владимир Путинай, мүн Федерации Соведэй болоод Гүрэнэй Дүүмын депутадуудай Крым республикада хабаадалгатай асуудалаар зориг үүсхэлнүүдые дэмжэжэ байһан тухайгаа мэдүүлбэ. Мүнөөдэр, мартын 21-дэ Хуралай зүблөөн дээрэ һунгамалнууд тусхай тогтоол баталан абаба. Тэрээн доторнь РФ-эй президентын болон правительствын Украинада тохёолдогшо ушар үйлэнүүдтэ харюу болохо жэшээтэй хабатай шанга ябуулгануудые дэмжэлгэ тухай хэлэгэнэ. Мүн тиихэдэ хилын саагуур ажаһуугааша улад зондоо шадал соогоо туһалха арга боломжонууд хараалагдана.
2014 оной мартын 16-да автономито Крым республикада ба Севастополь хотодо үнгэргэгдэһэн бүгэдын референдум дээрэ Крымай арад түмэн федерациин субъектын эрхэтэйгээр Росси уластай хамтарха тухайгаа шиидээ гээд һануулая. Тиин мартын 18-да Крым республикые Россиин бүридэлдэ оруулха тухай хэлсээн баталагдаа һэн.
- Бидэ, Арадай Хуралай депутадууд, республикын бүхы зондо хандажа, хилын саана байгааша аха дүү арадта шадаха зэргээрээ туһалаял гэжэ уряалнабди. Украинада тохёолдоһон шахардуу байдал зүб мүртөө орохо бэзэ. Крым республикын Россиин бүридэлдэ ороһон тухай хуули ёһо түргэн мүрөөр абтаха байха гээд найданабди, - гэжэ Буряадай Арадай Хуралай гүрэн түрэ эмхидхэлгын, нютагай өөрын хүтэлбэриин, хуули ёһонуудай болон гүрэнэй албанай талаар хорооной түрүүлэгшэ Борис Ботоев тэмдэглээ.
«Буряад республикын Арадай Хурал тухай» 52-дохи статьягаар Буряадай парламент гүрэн түрын бусад зургаануудай, эмхи хамтаралнуудай, тушаалтадайшье ажаябуулга тухай өөрын һанамжа мэдүүлхэ эрхэтэй. Тэрэшэлэн, республика, мүн бүхы улас ороншье дотор ушарһан байра байдал ажаглан тайлбарилха дүүрэн эрхэ депутадуудта үгтэнхэй гээд онсолмоор эндэ байна.
Политика и власть 24 марта 2014 г., 08:01
Заметили опечатку? Выделите ошибку и нажмите Ctrl+Enter.
Фото: с сайта go-baikal.ru
Поделиться
Поделиться
Отправить
Поделиться
Поделиться
Твитнуть
Отправить
Поделиться
