Арадай Хуралда Буряад Уласай болон Ростов можын тусхай сэрэгэй операцида хабаадагшадай габьяануудта зорюулагдаһан можо хоорондын үзэсхэлэн нээгдэбэ. Энэ хэмжээ ябуулга Ростов можын Хуули гаргалгын Суглаантай видео-холбоогой аргаар хоёр можо нютагуудай хоорондын парламентнууд хоорондын хамтын ажаллалгын хэлсээнэй хэмжээндэ үнгэргэгдэбэ.
Уласай парламентын фойе соо «Баатар хүнэй эсэгэ» гэһэн түсэлэй самбарнууд табигдаа. Тэдэнэр үнэн эрэшүүлые хүмүүжүүлһэн хүнүүдэй — хүбүүдэйнь домог болоһон эхэ эсэгын түүхэ хөөрэдэг һэн. Тиихэдэ үзэсхэлэндэ «ЛНР болон ДНР-ые сүлөөлхэ», «Ростов можын тусхай сэрэгэй операцида Россиин баатарнууд» гэһэн сэдэбтэ түсэлнүүд табигдаа. Айлшадта Буряад Уласай, Эрхүү можын, Үбэр Байгалай хизаарай, Агын буряадай автономито тойрогой тусхай сэрэгэй операцида хабаадаһан геройнууд тухай видео-буулгабаринууд, мүн «Сухаришагүй буряадууд» гэһэн видеоролик харуулагдаа.
Энэ баяр ёһолол Улаан-Үдэ болон Дон дээрэхи Ростов хотодо нэгэ доро нээгдэбэ. Буряад Уласай Арадай Хуралай зүгһөө Түрүүлэгшын уялга дүүргэгшэ Игорь Марковец үгэ хэлэбэ. Түүхын дурасхаал сахиха, ургажа ябаа залуу үетэндэ патриотизм түрүүлхэ хамтын түсэлнүүдэй шухала гээд тэрэ онсолон тэмдэглэбэ. Ростов можын зүгһөө Хуули гаргалгын Суглаанай түрүүлэгшэ Александр Ищенко сугларагшадта хандаба.
