Буряад Уласай Арадай Хуралай Түрүүлэгшэ Владимир Павлов Сагаалганда зорюулагдаһан баяр ёһололой хэмжээ ябуулгада хабаадаһан байна. Амаршалгын үгэнүүдые буряад хэлэн дээрэ хэлэхэдээ, үнгэрһэн жэлдэ пандемиһээ боложо, хүнгэн бэшэ жэл байгаа, Арадай Хуралай һунгамалнуудай зүгһөө бүхы эмшэдтэ баярые хүргэжэ, буряадай ажаһуугшадта элүүр энхые, түбшэн жаргалые хүсэһэн байна.
- Сагаалган хадаа гүнзэгы удхатай, урда сагһаа ерэһэн манай һайндэр гээшэ. Манай Буряад Уласай элдэб яһатанай улад зон Сагаалганаа сагаан сэдьхэлээр, сагаан бодолтойгоор, сагаан эдеэгээр угтадаг, бэе бэеэ амаршалдаг, хүндэлдэг, бэе бэедээ бэлэгүүдые баридаг заншалтай. Үнгэрһэн 2021 он үйлэ хэрэгүүдээр баян байгаа. Арад зонтойгоо хамта хүдэлжэ, ажабайдал һайжаруулхын түлөө ехэ ажал ябуулаабди. Буряад Уласай өөрын олзо бюджет соо жэлһээ жэлдэ нэмэгдэнэ гээд тэмдэглэхэ шухала. Шэнэ һургуулинууд, эмнэлгын байшангууд, хүүгэдэй сэсэрлигүүд, тамирай байшангууд нээгдэнэ. Мүн тиихэдэ харгынууд, хүүргэнүүд баригдана. Сагаан һараар, Сагаалганаар амаршалаад, ута наһа, гэр бүлэдөө амгалан тайбан, олон нүхэдтэй ажаһуухатнай болтогой!
Буряад Уласай Толгойлогшо Алексей Цыденов болон Арадай Хуралай Түрүүлэгшэ Владимир Павлов гэгшэд баяр ёһололой оршон байдалда гүрэнэй дуу хатарай «Байгал» театрта автобусай түлхюур барюулаа. Нёдондо жэл «Байгал» театрай байгуулагдаһаар, 80 жэлэй ойн баяр тэмдэглэгдэһэн байна. Энэ ушараар автобус абаха үнэмшэлгэ үгтэһэн тухай һануулая.
Арадай уран һайханай, уран зохёолой болон урлалай талаар Буряадай гүрэнэй шангууд энэ үдэр барюулагдаа. Мэдээжэ дуушадай болон уран һайханай бүлгэмүүдэй хабаадалгатай Сагаалганда зорюулагдаһан баярай концерт үнгэрһэн байна.
