Исток болон Солдатский тосхонуудай ажаhуугшадта амбулаториин нээлгэн үнинэй хүлеэгдэhэн бэлэг болобо. Нээлгээнэй баяр ёhололдо Арадай Хуралай түрүүлэгшэ Владимир Павлов ба социальна политикын талаар хорооной түрүүлэгшын орлогшо Светлана Будаева хабаадаа. Шэнэлэн заhабарилгын hүүлдэ энэ шэнэ амбулатори 565 кв.метр уужам талмай дээрэ оршобо. Гол мүнгэниинь 44 млн түхэриг Алас Дурнын субсидиин хэмжээнhээ, 2 млн түхэриг уласай бюджедhөө эмнэлгын оборудовани болон офисай мебельдэ үгтөө. Буряадай медстрах 1,4 млн түхэриг hомолоо.
Шэнэ эмнэлгын амбулаторида хоёр терапевт, хоёр педиатр, хоёр эмшэлгын врачнууд приём хэжэ, 11 мянган хүнhөө олон зондо түрүүшын эмшэлгын туhа хүргэхэ. Шэнэ байшан соо процедурна болон тарилгын кабинетнүүд, гурбан зоной арга абаха үдэрэй стационар,эхэ үхибүүн хоёрой таhалга, диагностикын, физиопроцедурна кабинетнүүд бии.
- Арадай Хуралай hунгамалнуудай зүгhөө бүхы ажаhуугшадые ба эмшэдые амаршалнаб. Мүнөө сагта эмшэлгэдэ Ород Уласай юрэнхылэгшын ба нютаг можонуудай засаг зургаан онсо анхаралаа хандуулна. Арадай Хуралай hунгамалнууд уласай медицинэ хододоо дэмжэдэгбди. Эмшэд hайн условида, шэнэ түхеэрэлгэнүүдтэй хүдэлхэ болоhон аргадань баяртай байнаб, - гэжэ парламентын түрүүлэгшэ нээлгэнэй баяр ёhолол дээрэ хэлэбэ.
