Арадай Хуралай Гүрэнэй байгуулалтын, нютагай өөhэдын хүтэлбэриин, хуули ёhоной ба гүрэнэй албанай асуудалнуудай талаар хорооной суглаан дээрэ Элүүрые хамгаалгын яаманай сайдай орлогшо Наталья Логина хуулиин түсэл дурадхаба. Энэ хуулиин ёhоор гүйсэдхэхы засагай зургаануудта эрхэ олгогдоно. «Тэлэрүүлгын» тусхай эмхинүүд эмшэлгын газарнуудай hуурида байгуулагдаха.
- Улаан-Yдэ хотодо иимэ пункт «Уласай наркологическа диспансерай» базын дэргэдэ нээгдэхэ гэжэ түсэблэгдэнэ. Мүнөө сагта байра бэдэрэлгын ажал ябуулагдана, - гэжэ сайдай орлогшо тодорхойлбо. Сүүдхын 24 сагай ээлжээнэй алба хаалганда 5 фельдшернүүдэй, 10 санитарнуудай ставканууд хэрэгтэй болохо. Уридшалан тоололгын дүнгөөр Улаан-Yдэ хотодо тэлэрүүлгын байшан нээлгэндэ мүнгэнэй гаргашын хэмжээн 15 миллион түхэриг болоно.
Элидхэгшые шагнаhанай удаа Арадай Хуралай hунгамалнууд Михаил Степанов ба Матвей Гершевич «тэлэрүүлгын» сэн тухай hонирхобо. Эмшэлгын хэмжээ ябуулганууд түлбэригүй, харин энэ эмхи зургаан субъектын тэдхэмжэдэ байха гэжэ сайдай орлогшо энэ асуудалдань харюу үгөө.
Буряад Уласта «тэлэрүүлгын» эмхи зургаануудай нээлгэн шухала хэрэгтэй. 2018-2020 онуудай тоо баримтануудай мэдээгээр эмшэлгын газарнуудта 3280 ехээр архи уугаад, ябажа шадахаа болиhон, харин эмшэлгын туhада хэрэггүй hогтуушуул ороhон байна.
