Арадай Хуралай түрүүлэгшын орлогшо Татьяна Мантатова Улаан-Yдэ хотын түмэр харгын hэльбэн шэнэлэгдэhэн вокзалай нээлгэнэй баяр ёhололдо хабаадаба.
Энэ хэмжээ ябуулга түмэр харгын ажалшадай мэргэжэлтэ hайндэрэй урда үнгэрөө. Татьяна Мантатова Арадай Хуралай түрүүлэгшын ба hунгамалнуудай зүгhөө ажалшадые амаршалаа. Шэнэ вокзалай комплекс – уласай арад зондо бэлэг гээшэ гэжэ тэрэ тэмдэглээ.
Түмэр харгынууд эгээл популярна, хэрэгтэй транспорт. Манай Эхэ ороной эрхэтэн бүхэн наhан соогоо нэгэшье hаа дахин түмэр харгыгаар ябалгатай ушарhан лэ байха. Россин түмэр харгынууд арад зоной тала, тэдэнэй зохид таатай ябадал урид харадаг, эрэмдэг бэетэй зондо тааруу байhаниинь hайшаалтай гээшэ.
Улаан-Yдэдэ түмэр харгын вокзалай hэльбэн шэнэлэлгын ажал 2018 ондо эхилээ гэжэ hануулая. Ажал хэдэн шатаар хэгдээ. Энэ саг болзор соо байшангынь, пассажирнуудай платформын конкорс, ябаган зоной харгы хэгдээ, вокзалай хажуудахи газар hайжаруулагдаа. Хамта дээрээ барилгын ажал 3,8 мянган дүрбэлжэн метрhээ ехэ болоо, түсэлэй сэн 950 миллион түхэриг тухай. вокзалай хажуудахи газар 1,2 мянган кв.метрээр ехэ болгогдоо. Мүнөө вокзалай байшан соо билет худалдадаг касса, амаралгын таhалга, кассын зал, бизнес зал, хүлеэлгын зал, хадагалдаг камера, санитарна таhалганууд ба бэшэшье байранууд багтаагданхай.
