Монгол орон ба Буряад Уласай хоорондохи харилсаанай ерээдүйн байдал тухай Улаан-Баатарта хэлсэбэ. Албанай хэрэгээр Монгол гараhан Буряад Уласай Арадай Хуралай hунгамалнууд Монголой Ехэ Хуралай түрүүлэгшэ Г.Занданшатартай уулзаба гэжэ Восток-Телеинформ уласай парламентын мэдээсэлэй албанhаа дуулгаба.
Монгол ороной парламентын толгойлогшо Буряад Уласай айлшадые угтан мэндэшэлбэ, тиигээд туризмын талаар суг хамта ажаябуулга урагшатай байхыень тэмдэглээ. «Монголдо Улаан-Баатар хотоhоо Сухэ-Баатар хото хүрэтэр мүнөө сагай эрилтэдэ таарама шэнэ харгы барилгын проект бэелүүлэгдэнэ. Улаан-Yдэ – Хяагта гэhэн харгытай хамта энэ магистраль Монгол Буряад орон хоёрые ниилүүлхэ байна»,- гэжэ тэндэ тэмдэглээ.
Монгол ороной Парламентын спикер Халхин-Гол дээрэ Илалтын ойн баяр тэмдэглэхэ хэмжээ ябуулганууд тухай хөөрэжэ үгэбэ. Буряад Уласай Арадай Хуралай түрүүлэгшэ Владимир Павлов гүрэнүүдэй хоорондохи харилсаанай хүгжэлтын ехэ үүргэтэй байhыень тэмдэглээ. Буряад орондо гал түлэхэ пеллетнүүдые үйлэдбэрилгын проект бэелүүлгэ тухай мэдүүлбэ. Энээнэй ехэнхи хубинь Монгол орон руу экспортээр ябуулагдаха гэжэ тэмдэглээ.
Энээнэй хажуугаар, Буряад Арадай Хуралай hунгамалнууд Улаан-Баатарта Россин эрдэм ухаанай ба соёлой түбтэй, Монголой гүрэнэй хүдөө ажахын университедтэй танилсаа.
