Арадай Хуралай дэргэдэхи Түлөөлгээтэ зургаануудай зүблэлэй ээлжээтэ суглаан һая үнгэргэгдэбэ. Тэрэнэй ажалда Арадай Хуралай түрүүлэгшэ Цырен-Даши Доржиев, хороонуудай түрүүлэгшэнэр Борис Ботоев, Александр Стопичев, орлогшонорынь Виктор Малышенко болон Баир Гармаев, депутат Баир Цыренов, Тоололгын палатын түрүүлэгшэ Евгений Пегасов, яамануудай түлөөлэгшэд, мүн нютагуудай өөрын хүтэлбэриин түлөөлэлгын зургаануудай тушаалтад хабаадалсаа, гээд Восток-Телеинформ уласай парламентын хэблэлэй албанай мэдээсэл дууряан дуулгана.
Суглаан Танхой тосхондохи Байгалай байгаалиин био-оршонгой дархан газарта эмхихэгдэһэн байна.
Мүнөөдэр бидэ нягта холбоотой хоëр асуудал хаража үзэбэбди: хүдөөгэй аяншалга хүгжөөхэ болоод Буряад уластаа хүдөөгэй бага зэргын ажахынуудые хүгжөөхэ гээшэнүүдые. Тэрээн зуур аймаг нютагуудай түлөөлэгшэдһөө Аяншалгын яаман энэ сагта хүдөөгэй аяншалга хүгжөөхэ талаар ажал мүртэй ябуулнагүй гэжэ бидэ мүнөө дуулабабди. Эдэ бүхы саг соо Хүдөө ажахын яамантай хамтаржа оройдоол ори ганса зүблөө үнгэргөө болоо, - гээд Доржиев онсолон тэмдэглээ һэн.
Улас түрын парламентые толгойлогшо Түлөөлэлгын зургаануудай зүблэлэй шиидхэбэри дотор хуули ëһото дансануудые зохëон бэлдэхэ саг болзор тодорхойлогдонхой гээд тэмдэглээ һэн. Гэхэ зуура, Арадай Хурал тус асуудалые хиналта дороо абажа, саашадаа бэелүүлэгдэһыень саг үргэлжэ шалгажа байха.
