Мэдээсэлэй «Восток-Телеинформ» агентствын сурбалжалагшада депутат, «Справедливая Россия» намай гэшүүн Баир Гармаевай дуулгаһаар, пенсидэ гараха наһанай болзор дээшэлүүлхэ тухай хуули түсэлые Арадай Хуралай Депутадуудай зүблэл Улад зоной байдал хангалгын түрын хороонойнгоо зарим тэды дурадхалнуудые хараада абан дэмжэһэн байна.
Уладай байдал хангалгын хороомнай үнөөхи тэрэ хубилалтануудта өөрын табан дурадхал оруулаа һэн. Тэдэнь булта манай эндэхи өөрсэ маяг шэглэл хараада абахые баадхаха зэргэтэй. Тэрэ тоодо, хойто хизаарай мэтэ шэрүүн уларилай эрилтэнүүдые гэхэ мэтэшэлэн. Тэдэ дурадхалнуудыень хараадаа абажа, Хуралай Зүблэл олонхи дуугаар тэрэ хубилалтануудые дэмжээ. Гэбэшье, һүүлшын шиидхэбэри Гүрэнэй Дүүмын мэдэлэй. Сентябрь һарада эли болохо, - гээд Гармаев онсолбо. – Минии һанахада, бидэнэйш хүсэл бодолнууд балайш тоогдохогүй байха. Энэ хэрэг гүрэн түрын засаг зургаанһаа дулдыдаха баатай аабза. Юрэдөө, нютаг можонуудай дунда һанамжануудыень суглуулха ябадал ха. Хэн нэгэн, дэмжэхэ, нүгөө зариман дуугай үлэхэ гэһэншүү. Бидэ дэмжэхэ баатайш хадаа, өөрын дурадхалнуудые табижа үзэхэмнай, - гэжэ тэрэ хөөрэжэ үгөө.
Арадай Хуралай зүблэлдэ дүн хамта 16 депутат ородог юм, гээд һануулая. Гармаевай хэлэгшээр, энэ удаа суглаанда 12-ынь хабаадаа, тэдэнэй 10 «зүб», хоëрынь «буруу» гэжэ дуугаа үгэһэн байна. Ородой Холбооной Уласай Засагай Газар июниин 14-һөө пенсида гараха болзорые дээшэлүүлбэ: 2034 онһоо эрэшүүл 60-тайһаа 65 наһандаа, эмэгтэйшүүл – 55-һаа 63 наһандаа пенсидэ гарадаг болохо жэшээтэй, гээд эндэ мүн лэ һануулая. Тус хуули түсэлэй һүүлшын шиидхэбэри Гүрэнэй Дүүмэдэ намартаа абтахаар хараалагдана.
