Байшан гэрнүүдэй нюур талада хабсаргалтануудые барихые буруушааһан «Захиргаанай эрилтэнүүдые хазагайруулха тухай» хуулида хубилалтануудые оруулха тухай түсэл Арадай Хуралай Эдэй түрын хорооной суглаан дээрэ зүбшэгдэбэ. Балконуудаа шэллэхые хүсэһэн зон заабол хотын захиргаанай зүбшөөл абаха гэһэн ëһые депутадууд дэмжэбэгүй, гээд парламентын хэблэлэй албан дуулгаба.
Гэбэшье, шэнэ эрилтэнүүдые оруулха шухала гээд мэриинхид үсэрхэнхэй. Ниислэл хотынгоо шанар шэнжые зохисуулха хэрэгтэй, тиигээдшье, улад зонойнгоо аюулгүй байдалые хараадаа эндэ абанабди, гээд мэрэй орлогшо Алексей Хандархаев ойлгуулна. Тэрэнэй хэлэһээр, өөрын арга хүсөөр шэллэһэн балконуудай хүниие даража, унаха болихые хэн мэдэнэб. Юунш һаа хотын архитектурын болон барилга зохисуулгын хороондо тусхай зүбшөөл абахые нилээд хүнгэдхэхэбди гээд Алексей Хандархаев өөрын талаһаа найдуулба. Гэр байшангууд бүридэ таатай хэбүүд зохëогдохо. «Гурим хазагайруулагшадые» элирүүлхэ талаар шалгалтанууд үнгэргэгдэжэ байха.
Эдэ мэтые шагнажа, Арадай Хуралай энэ талаар хорооной түрүүлэгшэ Анатолий Кушнарев хотын ажаһуугшад эдэ эрилтэнүүдтэ хэр дуратай байха хаб, тэрээн зуур, тус хуули яагаад сахигдажа байхаб гэжэ мүн лэ ойлгогдоногүй гээд бодомжолно.
Дурдагдаһан эдэ шэнэ эрилтэнүүд хуулиин бодото дээрээ абтаһанай һүүлдэ балконоо шэллэһэн зондо хабаатай, гээд тэмдэглэе. Юуб гэхэдэ, хуулиин хүсэндөө орохо хаһа мүн лэ арсалдаатай. Зүблөөнэй эсэстэ хабаадагшад 2018 оной апрель болотор туршалгын хугасаа хэрэгтэй ха гээд тунхаглаба.
