2016 он Буряад уласта нилээд хэсүү жэл болоо, - гэд Арадай Хуралай Мүнгэн һангай талаар хорооной түрүүлэгшэ Зоригто Цыбигмитов мүнгэ ашаглаха тухай асуудалаа олоной зүблөөн дээрэ дуулгаба. Бусад шалтагаануудай тоодо, һан жасада эгээл ехэ налого оруулдаг Улаан-Үдын агаарай онгосын заводай олзодо тохогдодог налогой хэмжээнэй доошолхоһоо шахардуу иимэ байдал тох ëолдоо гэбэ. 2015 онойхитой сасуулбал, тэрэ оршын хэмжээн аяар 15%-оор унаһан байна.
Гэбэшье, улас можымнай улад зоной байдал хангаха талаар эрилтэнүүд таһалгаряагүй бэелүүлэгдээ гээд Цыбигмитов онсолбо. Тиигээд абахада, Буряад орондо дүн хамта 19 программа хүдэлжэ байгаа. Тэдэнэй дунда эгээл ехэ мүнгэн хангалтада хэн хүртөөб гээ һаа, элүүрые хамгаалгын һалбари – 21%, һуралсалай һалбари – 23%, ажабайдал хангалтын түрэдэ – 16% тудалдана. 2016 ондо мүнгэн һанда аяар таба дахин хубилалтанууд оруулагдаа, хэр тиигэбэшье олзо оршын хуби яһала һайнаар бэелүүлэгдээ – 99,8%.
Мүнгэн һангай үнгэрэгшэ жэлнай хүндэхэн байба, тиигээшье хадань улад зонойнгоо ажабайдал доройтуулаагүйбди, Буряад уласайнгаа хүгжэлтын эршэ хүсэ унгаангүй гаралсаабди, уялгануудаа дүрэн хүсэндэнь дүүргэбди, - гээд хорооной түрүүлэгшэ тобшолбо.
