Буряад Уласай толгойлогшын уялгануудые саг зуураар дүүргэгшэ Алексей Цыденовтэ Арадай Хуралай мартын 1-дэ үнэрһэн хуралдаан дээрэ Засагай Газарай бүридэл һэлгүлхэ эрхэ олгогдобо. Конституциин 78-дахи тоглолдо заһалтын абтаһые тайлбарилхадаа Арадай Хуралай Гүрэнэй байра байшын, нютагай өөрын хүтэлбэриин, хуули ëһонуудай болон гүрэнэй албангай талаар хорооной түрүүлэгшэ Борис Ботоев, саг зуура тушаал эзэлэгшэ энэ эрхэеэ хэр хэрэглэгшэ ааб гэжэ һунгамалнууд хүлеэн һууха.
Хэрбээ ямарш хубилалта Засагай Газарта оруулаагүй гээшэ һаань, мүнөө байгааша кабминай ажал бараг гэжэ тоолоно гээд бодохобди. Энэнь манда, арад зондошье балай һайшаагдахагүй ха. Яагаа хээгээшье хадаа хубилалтануудые оруулбалнь, илангаяа, нүлөө ехэтэй тушаалнуудта Арадай Хуралтай зүбшөөжэ ондоо хүнүүдые табибалнь һайн һэн, - гээд Ботоев тоолоно. – Хахад жэлэй туршада шэнэ засаг газарай түхэл зуралглагдажа захалха байгаа. Тиин сентябрь соо бидэ бүгэдэ шэнэ зонуудай мэргэжэл мэргэниие тухайлхаа болохо һэмди.
Гэхэтэеэ хамта, тушаалтадые шэлэхэдээ Цыденов нютагай зониие гаргаа һаань зүбтэй байха һэн гээд Ботоев тэмдэглээ. Яһала бэрхэ, һайн залуушуулшье, ухаатай сэсэн, ажалдаа нарин хүтэлбэрилэгшэд эндэшье лаб бии, - гээд хорооной түрүүлэгшэ бата этигэлтэй.
