Хоёр единорос, мүн нэгэ өөрыгөө дэбжүүлэгшэ Буряадай Арадай Хуралай шэнэ депутадууд боложо тодорбо. Һунгалтын онсо үдэртэ, сентябриин 13-да парламентада гурбан тойрогоор нэмэлтэ һунгалта үнгэрөө. Улас түрын Һунгуулиин комиссиин түрүүлэгшэ Дмитрий Ивайловскиин мэдээсэһээр, һунгалтанууд болбосон ёһоор үнгэрөө гээд тоологдожо, Арадай Хуралда сүлөө үлэһэн гурбан мандат эзэлэгдэбэ.
Мэдээсэлэй «Восток-Телеинформ» агентствын урид дуулгаһаар, Арадай Хуралда 17 хүн орохо һанаатайгаа мэдүүлһэн байгаа: долоониинь табадахи тойрогоор, зурганиинь зургаадахи, мүн дүрбэниинь 31 дүгээр тойрогуудаар дэбжүүлэгдээ. Табадахи тойрогто тон олон хүн бүридхэлдэ абтаа һэн – эндэ депутадай мандадта дүрбэн кандидат хүртэхэ хүсэлтэй байба. Нүгөө хоёр тойрогто гурба-гурбан хүнэй нэрэ обогууд бюллетеньдэ оруулагдаа һэн. Тиин һүүлэй һүүлдэ Сэлэнгын ба Хяагтын аймагуудые багтааһан таба дугаар тойрогто өөрыгөө дэбжүүлһэн Сергей Цыдыпов илажа гараа. Тэрэнэй түлөө 43,73% һунгагшад дууга үгэһэн байна. Зургаадахи тойрогто (Хяагтын аймаг) «Единая Россия» намай түлөөлэгшэ Валерий Цыремпилов 60,63% дуутайгаар илалта туйлаба. Тиихэдэ Хурамхаанай ба Баунтын аймагуудые нэгэдүүлһэн 31-дэхи тойрогоор һунгагшад мүн лэ «Единая Россия» намай түлөөлэгшэ Александр Лоншаковые шэлэжэ гаргаа, тэрэ 54,01% дуу абаһан байна.
Ивайловскиин тэмдэглэһээр, һунгалтын үедэ зарим тэды хазагайруулта бүридхэгдөө – һунгуулиин хороондо 20 мүргэл ороһон байна. Гол түлэб һунгагшадай тоо бүридхэлэй дансануудтай буруу хүдэлһэнэй ушарнууд элирүүлэгдээ – юрэнхыдөө, холбожо оёхо гурим хазагайруулагдаа. Иимэ алдуу табан таһагта тэмдэглэгдээ. Хинажа адаглагшадай һайгаар энэ хазагайруулта түргэн мүрөөр заһагдаһан байгаа. Тэрэшэлэн идхалгын дүрим хазагайруулха табан ушар элирүүлэгдээ, мүн Хурамхаанай аймагта һунгагшадые зөөжэ асарха ябадал усадхагдаа.
