Буряадай Арадай Хуралай депутатууд Түнхэнэй аймагай улад зоной ажабайдал хангалтын һалбариин хэр хүгжэжэ байһантай танилсаба

Буряадай Арадай Хуралай һунгамалнууд сентябриин 29-һөө октябриин 1 болотор Түнхэнэй аймагаар айлшалба. Улас ороноймнай Зүблэлэй хэблэлэй албанай мэдээсэһээр, Арадай Хуралай спикер Матвей Гершевич түрүүтэй делегациин бүридэлдэ Мүнгэн һангай хорооной түрүүлэгшэ Цырен Доржиев, мүн Түнхэнэй аймагһаа дэбжүүлэгдээшэ: Ким Галсанов, тиихэдэ Гүрэн түрын байгуулалтын талаар хорооной түрүүлэгшэ Борис Ботоев гэгшэд ороһон байгаа.

Арадай һунгамалнууд зоной байдал хангалтын зарим тэды газарнуудые эрьеэ: Талое тосхон, Галбайда һэльбэн шэнэлэгдэжэ байһан спортын байшан. Хэрэндэ тэдэ захиргаанай шэнэ байшан сэгнээ. Тэндэнь ЗАГС, мүн гүрэнэй болоод бусадшье хангамжа үзүүлдэг олон үүргэтэ түб байрлахаар хараалагданхай. Аймагай түбтэ депутатууд октябриин хуушаар нээгдэхээр түсэблэгдэһэн 100 һууритай хүүгэдэй сэсэрлигэй хэр баригдажа байһые хараа. Энэ сагта барилгашад дотор ажалыень дүүргэжэ, тойронхи газарыень болбосон түхэлдэнь оруулжа байнхай. Матвей Гершевичэй тэмдэглэһээр, энэ «хүүгэдэй ёһотой ордон» бодобо.

Һунгамалнууд Түнхэнэй үргэл ехэтэй «Бурхан баабай – Шаргай ноён» гэжэ газарта бараалхаа. Мэнэ һаяхан эндэ шэнэ дасан нээгдээ һэн. Тэрээниие барилгада хамаг зон хандиб оруулаа, Арадай Хуралай депутат Ким Галсановшье хубитаяа оруулһан байна.
- Дасан хоёр жэл шахуу хугасаа соо бүтөө. Туһаламжа гэхэһээ, үдэр бүри гэхээр орожол байгаа, - гээд тэрэ тэмдэглэхэ юм. – Мүнөө болоходо Сибириин, Россиин түбэй орон нютагуудһаа олон тоото мүргэгшэд наашаа ябадаг, зон һонирхоно, манай соёл заншал мэдэхэ болоно.

Ажалай хэрэгээр ябаһан тула Арадай Хуралай һунгамалнууд аймагай эдэбхитэдтэй, хүдөө һуурингуудай толгойлогшонортой, шэнэ бүридэлэй зүблэлэйнь депутадуудтай уулзаһан байха юм. Матвей Гершевич һаяар аймагай зүблэлэй түрүүлэгшээр һунгагдаһан Аламжи Сыреновые амаршалаа. Уулзалгада хабаадагшад газар яажа үмсэлхэ тухай, нютагай өөһэдын хүтэлбэриин зургаанууд тухай, хүдөө нютагуудай соёлой байшангуудые дэмжэхэ тухай, элүүржүүлгын Аршан курортын саашанхи ажал тухай асуудалнуудые зүбшэн хэлсэбэ. Айлшалгынгаа дүнгүүдые согсолхо дээрээ Матвей Гершевич ехэ урмашаһан тухайгаа тэмдэглээ.

-Аймагай хүтэлбэрилхы зургаан яагаад хүдэлдэг бэ мэдэнэб, гэбэшье шагнаһан дуулаһанһаа нэгэ дахин хараһан дээрэ. Хэрбээ 2011 ондо Түнхэнэй аймаг республика дотороо 19-дэхи һуурида байһан һаа, нёдондоной дүнгүүдээр эрхим табанай дунда орохо аргатай. Эндэ аймагай хүтэлбэрилэгшэдэй аша габья ехэ, - гэжэ республикын парламентын түрүүлэгшэ эсэслэхэ юм.