Үбэр Байгалай арадуудай угсаата зүйн музей гаршагтай ба мэдээсэлэй самбарнуудаа буряад хэлэндэ оршуулха зорилго табинхай. Уласай Болбосоролой болон эрдэм ухаанай яаманай мэдээсэһээр, энэ хэрэгыень Гүрэнэй оршуулгын албан бэелүүлжэ эхилээ гэжэ Восток-Телеинформ бэшэнэ.
Энэ ажал «2021 - 2030 онуудта буряад хэлэ сахин хүгжөөлгэ» гэһэн улас түрын программын шугамаар ябуулагдана гэжэ тэмдэглэхэ шухала. Тус программые Болбосоролой болон эрдэм ухаанай яаман залан хүтэлдэг, гол гүйсэдхэгшэнь - яаманай Буряад хэлэ хүгжөөхэ талаар улас түрын түб.
- Гүрэнэй эгээл ехэ музейнүүдэй нэгэн болохо Үбэр Байгалай арадуудай угсаата зүйн музейн захиргаан бүхы самбарнуудаа ород, буряад, англи хэлэнүүд дээрэ бэшэхэ гэжэ шиидээ. Энэ ехэ хэрэгтэ туһалхыень «Үндэһэн хэлэнүүдые болон угсаата соёлой бусад зүйл шудалалгые дэмжэхэ талаар улас түрын «Бэлиг» түб» гэһэн гүрэнэй бюджедэй эмхи зургаанай һалбари болохо Гүрэнэй оршуулгын албанда хандаһан байна, - гэжэ яаманда мэдээсээ.
Улаан-Үдэ хотын захада оршодог тус музей нарата Буряад ороной танюуһата тэмдэг болоно гээшэ. Эндэ хүннүүдэй, мүн буряад, эвенк ба һоёдуудай болон Үбэр Байгалай хасагуудай, шэмээшэгүүдэй һуудал байдал үргэнөөр харуулагданхай. Айлшад үзэсхэлэн тала дайдада ажаһуудаг арадуудай соёл, түүхэ, ёһо заншалтай танилсаха аргатай.
Нэмэжэ хэлэхэдэ, энээнһээ урид Улаан-Үдэ хотын Захиргаанай байшанай үүдэндэ буряадаар бэшээтэй хабтаһанууд бии болоо һэн. Хотын Зүблэлэй түрүүлэгшэ Чимит Бальжинимаев «Түлхи/толкай» болон «Тата/тяни» гэһэн тусхай хабтаһануудые үүдэндэ няагаа юм.
- Улаан-Үдэ хотын Зүблэл буряад хэлэ хүгжөөлгэдэ хабаатай шэглэлнүүдые эдэбхитэйгээр дэмжэдэг. Хотын номой сантай, блогернуудтай суг түсэлнүүдые бэелүүлдэгбди, олондо мэдээсэл тараадаг эмхинүүдэй буряад редакцинуудтай хамта ажал ябуулдагбди, - гэжэ Чимит Бальжинимаев тэмдэглээ.
