Буряад Уласай толгойлогшо Алексей Цыденов февралиин 13-да ажалай хэрэгээр Яруунын аймагаар ябахадаа хоер шэнэ соёлой байшангуудые шалган хараба. Шэрэнгэ нютагта 112 һууритай шэнэ соёлой байшантай танилсаба.
«Алас Дурнын федеральна тойрогой бүридэлдэ ороһоной ашаар ба президентын субсидиин туһаар Гунда нютагта соёлой байшан баригдаа, Комсомольское тосхондо соёлой байшан һэльбэн шэнэлэгдээ, Нарһата тосхон дээрэ соёлой түб нээгдээ, харин мүнөө Шэрэнгэдэ бидэ соёлой байшан нээжэ байнабди. Ехэ гоёор баригданхай байна, олон зоной суглараад байхада ехэ зохид байна. Тиимэһээ, энэ юумэн ехэ хэрэгтэй гээшэ, -гэжэ Буряад Уласай толгойлогшо тэмдэглээ.
575 ажаһуугшадтай энэ хүдөө нютагта иимэ газар нээлгэн ехэ удха шанартай хэрэг ябадал болоно. Эндэ энэ сагһаа хойшо «Найдал (Надежда)» ба «Одон (Звезда)» гэжэ дуунай бүлэгүүд, «Бриз» ба «Бадма Сэсэг» гэһэн аман зохёолой коллективүүд зохёохы ажалаа үргэлжэлүүлхэ аргатай болоо. Соёлой байшанай барилгада 8,4 сая түхэриг һомологдоһон байна.
Алексей Цыденов үшөө Поперечное һууринда соёлой байшантай танилсаа. Энэ клуб 1991 онһоо хойшо хүдэлдэг. Яруунынгаа аймагта ород соёлой түб болодог юм. 2015 ондо энэ байшан һэльбэн шэнэлэгдэһэн байна. Мүнөө эндэ хүдөөгэй номой сан хүдэлдэг, «Сударушка» гэжэ арадай уран һайханай коллектив, «Родники» ба «Домисолька» гэжэ дуунай бүлэгүүд, хүүгэдэй «Суббатея» гэжэ аман зохёолой бүлэг зохёохы ажалаа ябуулна.
Ансамбльнууд Буряад Уласай толгойлогшодо зохеохы ажалаа , блины шараха арга шадалаа харуулаа. «Родник» гэһэн ТОС- ой эдэбхитэйшүүл хэмжээ ябуулганууд тухайгаа хөөрөө.
