Улаан- Үдэ хотын Тулунжа гэһэн микрорайондо бүхы зониие аргалдаг дүй дүршэлтэй эмшэнэй офис нээгдэбэ. Хотын мэдээсэлгын захиргаанай баримтаар Тулунжада 5 мянганһаа дээшэ зон ажаһуудаг. 457 дүрбэлжэн метр талмайтай байшан худалдажа абалгада,үндэһөөрнь һэльбэн шэнэдхэлгэдэ Алас Дурнын субсидиин 31 сая түхэриг эльгээгдээ.
Микрорайонай ажаһуугшадые энэ ехэ шухала ушар хэрэгээр хотын засаг даргын уялга дүүргэгшэ Олег Екимовский амаршалаа.
- 8 жэлэй саана Сэлэнгын зүүн эрьеын хүгжэлтын түсэб табигдаһан юм. Харин мүнгэнэй талаар энэ хэрэгнай тогтоһон байгаа. Энэ жэл түүхэдэ орохо гэжэ һанагдана. Ниитын объектнууд: һургуулинууд, хүүгэдэй сэсэрлигүүд үргэнөөр баригдажа байна. Энэ Сотниково, Поселье, Хойто Бэе ба Гурульба. Шэнэ амбулаториин нээлгэ дүүрэн хүгжэлтэ гэршэлнэ, -гэжэ Екимовский тэмдэглээ.
Хуушан амбулатори 62 дүрбэлжэн метр талмайтай модон байшан соо оршодог һэн. Тэндэ сэбэр уһаар хангалгын, дулаасуулгын түхеэрэлгэгүй ба сэбэрлэлгын һужаагүй байгаа, уйтан, тааруу бэшэ таһалгануудтай дээрэһээ үдэрэй стационар эмхидхэхэ аргагүй бэлэй. Шэнэ офис соо гурбан эмшэн зониие аргалха, тарилгын ба процедурна, функциональна диагностикын таһалганууд, үдэрэй арга хэдэг стационар ба бэшэшье хэрэгтэй таһалганууд хүдэлхэ, тэдэнэй тоодо эрэмдэг бэетэй зондо тааруулагданхай байранууд байха.
